Қазір Ормуз бұғазы арқылы тәулігіне шамамен 10 млн баррель мұнай мен мұнай өнімдері тасымалданады. Алайда Вашингтон жағдайдың тез арада қалыпқа келетініне сенбейді. АҚШ энергетика министрі Крис Райт бұл бағыт бойынша Иранмен жақын арада келісімге келуге үміттенуге әлі ерте екенін айтты, деп хабарлайды Ulysmedia.kz.
Мұнай жеткізілімі не болып жатыр?
Райттың айтуынша, тағы 4-5 млн баррель мұнай тәулігіне құбырлар арқылы тасымалданады. Жуырдағы шабуылдардан кейін Сауд Арабиясының «Шығыс – Батыс» мұнай құбыры уақытша жұмысын тоқтатты. АҚШ оның жақын арада қайта іске қосылатынын күтеді.
Райттың бағалауынша, мұнай жеткізілімі бұрынғы деңгейдің шамамен үштен екісіне дейін қалпына келген. Бұл туралы Bloomberg хабарлады.
– Әлемдік мұнай нарығындағы ахуал біз қалағаннан да күрделі. Алайда жағдай сындарлы деңгейде емес, – деді ол.
Иран ұсыныс әзірлеп жатыр
Тегеран Оманға Ормуз бұғазы арқылы кемелердің уақытша жүруіне мүмкіндік беретін келісім жобасын ұсынбақ. Бұған дейін Иран мен Абу-Даби арасында сирек кездесетін тікелей келіссөздер өтіп, өңірде өзге де дипломатиялық байланыстар болған.
Райт АҚШ келіссөздерді қолдайтынын, бірақ Иранның ядролық қаруға ие болуына жол бермейтінін атап өтті.
– Біз келіссөздерді қолдаймыз, – деді министр.
Сонымен қатар ол жасырын ядролық бағдарлама жалғасқан жағдайда Вашингтонның қатаңырақ әрекет етуге дайын екенін ескертті.
Инспекторлар кіргізілмей отыр
2025 жылдың маусымынан бері халықаралық инспекторлар Иранның қару жасау деңгейіне жақын мөлшерде байытылған уран қорының жағдайы мен қай жерде сақталғанын толық тексере алмай отыр.
Алдыңғы аптада АҚШ МАГАТЭ-нің Иран мәселесін БҰҰ Қауіпсіздік Кеңесіне қайта жіберу туралы шешімін қолдады.
МАГАТЭ басшысы Рафаэль Гросси сондай-ақ Иранның ядролық бағдарламасымен байланысты деген Pickaxe Mountain нысанының маңында жаңа белсенділік байқалғанын хабарлады. Алайда ол жерде нақты қандай жұмыстар жүргізіліп жатқаны әзірше белгісіз.
