Ресей президенті Владимир Путин Дональд Трамппен қарым-қатынасын сақтап қалу үшін аумақ бойынша мәселеде Украинаға қатысты ұстанымын жұмсартуы мүмкін. Мұндай болжамды саясаттанушы Аркадий Дубнов айтты. Ол Абу-Дабидегі келіссөздерден кейін Ресей делегациясының басшысы Владимир Мединскийдің сөзіне назар аударған, деп хабарлайды Ulysmedia.kz.
Мән-жай
Кездесуден кейін Владимир Мединский:
– Жеріміздің әрбір сүйемін қайтарып аламыз. Қалай болғанда да, – деді.
Аркадий Дубновтың назарын Мединский мәлімдемесінің соңғы үш сөзі аударған. Саясаттанушының пікірінше, Путин көмекшісінің осындай кесімді мәлімдемесі Мәскеудің уақытша ымыраға келуге дайын екенін аңғартуы мүмкін.
– Бұл мәлімдеме Путиннің бүгінде Трамптың қысымымен немесе өтініші бойынша, оған саяси жетістіктер ауадай қажет болғандықтан, аумақтық мәселеде уақытша шегінуге дайын екенін білдіруі мүмкін. Өйткені Трамппен қарым-қатынас, ол қанша жерден «ақсақ үйрек» болса да, алдағы жылдары Ресей үшін өте маңызды. Ал кейін бұрынғы ұстанымына оралуына болады, – деп пайымдады сарапшы.
Контекст
Еске салайық, Ресей, АҚШ және Украина өкілдерінің консультациясы 10-11 қарашада Абу-Дабиде өтті. Келіссөздерден кейін америкалық келіссөз жүргізушілер Стив Уиткофф пен Джаред Кушнер Кремльде Владимир Путинмен кездесті. Кейін олар келіссөздердің қорытындысын Украина президенті Владимир Зеленскийге жеткізді.
