Қазақстандық ата-аналар балалы болған кезде берілетін біржолғы жәрдемақыны уақытында өтініш бермесе, ала алмай қалуы мүмкін. «Азаматтарға арналған үкімет» мемлекеттік корпорациясы төлемді рәсімдеуге қанша уақыт берілетінін және қаражатты қалай алуға болатынын еске салды, деп хабарлайды Ulysmedia.kz.
Төлем мөлшері
2026 жылы жәрдемақы мөлшері отбасында дүниеге келген баланың нешінші екеніне байланысты. Бірінші, екінші және үшінші балаға 164 350 теңге беріледі. Төртінші және одан кейінгі балаларға – 272 475 теңге.
Жылдың алғашқы сегіз айында жәрдемақыны 200 мыңнан астам отбасы рәсімдеген. Төлем ең көп Түркістан облысында тағайындалған – 28 мыңнан астам отбасы. Алматыда жәрдемақыны 19 мыңнан астам отбасы, Астанада 17 мыңнан астам отбасы алған.
Ақшаны қалай алуға болады
Жәрдемақыны ХҚКО-ға бармай-ақ рәсімдеуге болады. Бала туғаны тіркелгеннен кейін ата-анаға SMS хабарлама келуі керек. Онда төлемді алуға келісімін растап, банктік шотын көрсету қажет. Осыдан кейін жәрдемақы автоматты түрде тағайындалады.
SMS келмесе, өтінішті электронды үкімет порталы, банктердің мобильді қосымшалары немесе кез келген ХҚКО арқылы беруге болады.
Портал мен банк қосымшалары арқылы рәсімдеу төрт жұмыс күніне дейін, ал ХҚКО арқылы жеті жұмыс күніне дейін созылады.
«Азаматтарға арналған үкімет» мемлекеттік корпорациясы өтінішті бала туған күннен бастап 18 ай ішінде беру қажет екенін ескертеді. Осы мерзім өткеннен кейін біржолғы жәрдемақыны алу мүмкін болмайды.
