Алматы қаласы Алмалы ауданы №2 аудандық сотының судьясы Зульфия Баки Көкшетау қалалық соты әкімшілігінің басшысы болып қызмет еткен 27 жастағы Аян Дүйсековтің өліміне қатысты пікір білдірді, деп хабарлайды Ulysmedia.kz.
Зульфия Баки бұған дейін, 2015–2019 жылдары, Алматы қаласы бойынша Соттар әкімшісі басшысының орынбасары болып қызмет атқарғанын атап өтті. Оның айтуынша, сот жүйесінің ішкі жұмысын жақсы біледі.
Судья марқұмның туыстары айтқан жұмыстағы ықтимал моральдық және психологиялық қысым туралы мәлімдемелер жан-жақты тексерілуге тиіс деп есептейді.
Сондай-ақ, ол ұжымдағы ахуал үшін басшылардың жауапкершілігіне назар аударды.
- Жоғары тұрған басшы тек тәртіп пен жұмыс нәтижесіне емес, ұжымдағы қалыпты ахуалға, қызметкерлерге құрметпен қарауға және төмен тұрған маманды кез келген моральдық әрі психологиялық қысымнан қорғауға да жауапты, - деді судья.
Баки тәртіптік жаза мен мемлекеттік қызметшілерге адами тұрғыдан қарау мәселесіне де жеке тоқталды.
- Қызметкер қандай қателік жасаса да, ешбір тәртіптік жаза адам өміріне тең келмейді. Кадрлық немесе тәртіптік шешім қабылдағанда адамгершілікті жоғалтпай, алдымызда жай ғана қызметкер не лауазымды тұлға емес, ең алдымен Адам тұрғанын ұмытпауымыз керек, - деп жазды ол.
Жазбасының аяғында судья марқұмның отбасына көңіл айтты.
Еске салайық, 27 жастағы Аян Дүйсеков Көкшетау қалалық соты әкімшілігінің басшысы болып жұмыс істеген.
Ол қайтыс болғаннан кейін туыстары жұмыс орнында моральдық және психологиялық қысым болуы мүмкін екенін мәлімдеді.
Ақмола облысының Сот әкімшілігі бұл айыптауларды жоққа шығарды. Ведомство тәртіптік жаза еңбек тәртібін бұзуға байланысты қолданылғанын, ал Дүйсековті қызметтік баспанадан шығару мәселесі мүлде көтерілмегенін хабарлады.
Қазір оның өліміне қатысты мән-жай тергеліп жатыр.
