Ақтөбе облысында сот Kazenergy жеке кәсіпкерлігінің басшысын заңсыз кәсіпкерлікпен айналысып, ақшаны жымқырғаны үшін 3 жыл 9 айға бас бостандығынан айырды, деп хабарлайды Ulysmedia.kz.
Толығырақ
Кәсіпкер 10 мың шаршы метр аумақтағы өндірістік базада қауіпті қалдықтарды заңсыз өңдеумен айналысқан. Ол пайдаланылған майларды, мұнай шламын және құрамында мұнай бар басқа да қалдықтарды сатып алып, оларды нафтамен араластырып, циркуляция әдісімен өңдеген.
Кәсіпкердің тиісті лицензиясы да, экологиялық рұқсаты да болмаған.
Кәсіпкер жұмыс істеген уақыт ішінде 11 миллион литрден астам пеш отынын сатып, 778 миллион теңге табыс тапқан.
— Отын ұлттық сапа стандарттарына сәйкес келмеген және құрамында зиянды химиялық компоненттер болған. Оны тұрмыстық және өнеркәсіптік қазандықтарда пайдалану ауаға улы заттардың таралуына әкелуі мүмкін. Бұл өңір тұрғындарының денсаулығына қауіп төндірді, — деп хабарлады Қаржылық мониторинг агенттігі.
Сот оның мүлкін тәркіледі. Оның ішінде өндірістік нысан, автокөліктер және банк шоттарындағы қаражат бар.
Үкім әзірге заңды күшіне енген жоқ.
