Қазақстанның қорғаныс министрі Айдос Мырзахметов АҚШ елшісі Джулия Стаффтпен кездесті, деп хабарлайды Ulysmedia.kz.
Кездесу туралы Қорғаныс министрлігінің мәліметінше, кездесуге АҚШ елшілігінің әскери атташесі, полковник Кристофер Дистифено да қатысты.
Ведомство қысқаша ақпаратпен шектелді. Белгілі болғаны – тараптар қорғаныс саласындағы екіжақты ынтымақтастықтың қазіргі жай-күйін талқылады.
Қайғылы оқиғадан кейінгі армиядағы реформа
Айдос Мырзахметов Каспийдегі қайғылы оқиғадан кейін Қорғаныс министрлігін басқарды. 24 қыркүйекте әскери жаттығу кезінде толқын 17 әскери қызметшіні алып кеткен. Олардың тек үшеуі аман қалды. Осы оқиғадан кейін қорғаныс министрі ауысты.
Кеме жүргізу қағидаларын бұзды және қызметіне салғырт қарады деген күдікпен Әскери-теңіз күштерінің бас қолбасшысын қоса алғанда, сегіз лауазымды тұлға қамауға алынды.
Мемлекет басшысының тапсырмасымен армияда ауқымды тексеру басталды. Комиссия Қорғаныс министрлігінің 100-ден астам нысанын тексерді. Анықталған заңбұзушылықтар бойынша қылмыстық қудалау органдары 37 істі қарастырып жатыр.
Тексерушілер ведомствоның шығындарын, әскери қызмет жағдайларын, сарбаздардың тамақтануы мен медициналық қамтамасыз етілуін де зерттеп жатыр.
Сонымен қатар Қазақстанда әскери реформа басталды. Армияда командирлерге тәуелсіз әскери кеңесшілер институтын құру, қызмет жағдайларын жақсарту және әскерге шақырылатын азаматтарды даярлау жүйесін өзгерту жоспарланған.
Жаңа жүйе бойынша сарбаздар алғашқы алты айда арнайы орталықтарда оқып, содан кейін әскери бөлімдерде қызмет етеді. Бұл тәртіпті 2027 жылы сынақтан өткізу жоспарланып отыр.
Президент әскери қызметшілерді басқару мен даярлау тәсілдерін қайта қарауды талап етті. Негізгі ұйымдастырушылық өзгерістерді 2026 жылдың соңына дейін жүзеге асыру көзделген. Ал ауқымды реформалар бірнеше жылға созылады.
