Алатау қаласындағы Gate City тұрғын үй кешенінің тұрғындары 2 қазанда бірнеше сағат бойы жарықсыз отырғанын және электр қуатының қашан қайта берілетіні жөнінде нақты ақпарат ала алмағанын айтты. Кейін олар Президент Қасым-Жомарт Тоқаев пен жергілікті билікке ашық үндеу жолдады, деп хабарлайды Ulysmedia.kz.
Мән-жай
Тұрғындардың айтуынша, электр жарығы шамамен сағат 15:30-да өшкен. Алайда түнге дейін мәселе шешілмеген.
Олар тұрғын үй кешенінде газ пайдалануға болмайтынын, сондықтан пәтерлердің барлығы электр қуатына тәуелді екенін айтады. Жарық өшкен соң ас пісіру мүмкін болмай, су қайнату, телефон қуаттау және үйден жұмыс істеу қиындаған. Әсіресе кішкентай балалары бар отбасыларға ауыр тиген.
– Апат болатынын түсінеміз. Бірақ тұрғындарға кем дегенде нақты ақпарат берілуі керек қой, – деп жазды тұрғындар.
Олар жарықтың не себепті өшкенін, апаттың қай жерде болғанын, жөндеу жұмыстары жүріп жатқан-жатпағанын және электр қуатының нақты қашан қосылатынын түсіндіруді талап етті.
– Gate City тұрғындары нақты жауап күтеді: жарық қашан қосылады? – делінген үндеуде.
Ulysmedia.kz редакциясы ресми түсініктеме алу үшін Алматы облысының әкімдігіне сауал жолдаған.
Тұрғындар бұған дейін су мәселесіне шағымданған
Gate City-де коммуналдық мәселе алғаш рет туындап отырған жоқ. Жазда тұрғындар су ұзақ уақыт берілмеген соң түнде аулаға жиналған.
Сол кезде олар мұндай жағдайдың жиі қайталанатынын, ал бір жолы су бір тәулікке жуық болмағанын айтқан.
Қоянқұстағы мәселелер туралы Тоқаев та айтқан
Маусымда Қасым-Жомарт Тоқаев Алатау қаласының құрамына енген елді мекендердегі, соның ішінде Қоянқұстағы инфрақұрылым мәселелеріне арнайы тоқталған.
Президент тұрғындардың тұрақты интернеттің жоқтығына, жол сапасына, орталықтандырылған ауызсу жүйесінің болмауына және электр жарығының жиі өшуіне шағымданып жүргенін айтқан.
Мемлекет басшысы сол кезде Alatau City-ді дамыту жөніндегі ауқымды жоспарлар аясында мұндай жағдайдың үлкен қайшылық тудыратынын айтып, инфрақұрылым мәселелерінің баяу шешіліп жатқанын сынға алған.
