Шымкентте 50-ден астам этнос өкілі тұрады. Қалада өткен кездесуде тұрғындар арасындағы қоғамдық диалогты жандандырып, оның нақты пайдасын арттыру мәселесі сөз болды. Жиында мәдениет пен дәстүрді дәріптеумен қатар, жастарды қолдау, жанжалдардың алдын алу және жаңадан құрылатын қоғамдық кеңестің жұмысы талқыланды, деп хабарлайды Ulysmedia.kz.
Басқосуға этномәдени бірлестіктердің өкілдері, қоғам қайраткерлері және Қазақстан Халық кеңесінің мүшелері қатысты. Кездесудің негізгі тақырыбы жаңа кеңестің жұмысына арналды. Қатысушылар оның іс жүзінде қалай жұмыс істейтінін және қандай мәселелерді шешуге ықпал ете алатынын талқылады.
24KZ арнасының хабарлауынша, ұсыныстар қатарында жастарды қоғамдық өмірге белсендірек тарту, даулы мәселелерді бейбіт жолмен шешу үшін медиацияны дамыту және түрлі этнос өкілдері арасындағы өзара түсіністікті нығайту бастамалары болды.
Шымкент әкімінің орынбасары Сәрсен Құранбек қоғамдық бірлестіктер өкілдеріне атқарып жүрген жұмыстары үшін алғыс айтып, қоғамдағы келісім мен татулықты сақтаудың маңызын атап өтті.
Жиында барлық ұлт пен ұлысқа ортақ құндылықтарға ерекше назар аударылды. Олардың қатарында заңды құрметтеу, жауапкершілік, еңбекқорлық және елге деген сүйіспеншілік бар. Қатысушылардың пікірінше, бұл қағидаттар құр сөз күйінде қалмай, нақты іспен көрініс табуы керек.
– Еліміздің тұрақты дамуы, ең алдымен, қоғамдағы өзара түсіністікке, азаматтық жауапкершілікке және ортақ мақсатқа жету жолындағы бірлікке байланысты, – деді Қазақстан Халық кеңесінің мүшесі Әбдез Иманқұлов.
Кездесуде қоғамға пайда әкелетін бірлескен бастамалар да сөз болды. Қазақстан ұлттық гимнастика федерациясының президенті Әлия Юсупова Алматыда жаңа гимнастика орталығының құрылысы жүріп жатқанын айтты.
Оның сөзінше, орталық гимнастиканың барлық түрін қамтиды. Бұл Орталық Азиядағы бірегей спорт кешені болмақ.
Жаңа кеңес түрлі қоғамдық топ өкілдері маңызды мәселелерді талқылап, оларды шешу жолдарын ұсына алатын ортақ алаң ретінде қарастырылып отыр. Шымкентте бұл бастама қаланың этномәдени әралуандығын сақтауға ғана емес, күнделікті тұрмыста туындайтын мәселелерді бірлесе шешуге де көмектеседі деп үміттенеді.
Кеңес жұмысының нәтижесі қатысушылар ұсынған бастамалардың қаншалықты жүзеге асатынына және оның нақты пайдасын тұрғындардың сезіне алуына байланысты болмақ.
