Жамбыл облысы Тұрар Рысқұлов ауданының Қызылшаруа ауылында түнде тұрғын үйдің маңында атыс болған. Заңгер Ғабит Өмірбек бұл оқиғаға аудандық ХҚКО басшысының қатысы болуы мүмкін екенін мәлімдеді, деп хабарлайды Ulysmedia.kz.
Оқиғаның мән-жайы
Заңгердің айтуынша, оқ тұрғындардың бірінің үйі маңында атылған. Көршілер шошып қалған, ал үй иесі біраз уақыт сыртқа шығуға қорыққан.
– Түнде осы үйге қарай оқ атылған. Жерде гильзалар шашылып жатты. Полиция келіп, оларды жинап алды, – деді Өмірбек.
Оның сөзінше, ер адам мас күйде болуы мүмкін әрі түнде қызметтік көлікпен жүрген.
Өмірбек Жамбыл облысы Полиция департаментінің басшылығына жүгініп, болған жағдайға жан-жақты құқықтық баға беруді сұрады. Заңгердің пікірінше, ер адамның әрекетінен қару қолданылған бұзақылық белгілері бар-жоғын тексеріп, атылған оқ нақты бір адамның өмірі мен қауіпсіздігіне қатер төндірді ме, соны анықтау қажет.
– Неліктен оның әрекетіне қылмыстық-құқықтық баға берілмеді? Неге атыс қаруын қолданған бұзақылық белгілері бойынша тексеру жүргізілмейді? – деді заңгер.
Полиция не дейді?
Полиция мәліметінше, тыныштықты бұзып, қаруға ұқсас заттан оқ атқан 56 жастағы ер адам анықталған.
Ол Қазақстан Әкімшілік құқықбұзушылық туралы кодексінің 485-бабының 1-бөлігі бойынша әкімшілік жауапкершілікке тартылды.
Оның атына тіркелген 12-калибрлі ТОЗ-34Р аңшы мылтығы тәркіленді.
Сондай-ақ, ер адамға заң талаптарын сақтау және алдағы уақытта құқық бұзушылыққа жол бермеу жөнінде профилактикалық түсіндіру жұмысы жүргізілді.
