Германия канцлері Фридрих Мерц Киевке экономика министрі Катерина Райхе және ірі неміс компанияларының өкілдерімен бірге келді. Сапардың басты тақырыптары – Украинаға жаңа көмек көрсету және қару-жарақты бірлесіп өндіру, деп хабарлайды Ulysmedia.kz.
Берлин Украинаға 1 млрд еуро көлемінде әскери көмек және энергетикалық инфрақұрылымды қалпына келтіруге тағы 350 млн еуро бөлуді жоспарлап отыр. Бұдан бөлек, Германия мен Украина бірнеше үлгідегі дрон аппараттарын бірлесіп өндіру жөніндегі келісімді түпкілікті бекітпек.
– Алдағы апталарда Украинаға біздің барынша қолдауымыз қажет. Бүгін Киевке жасаған сапарымыздың себебі де осы , – деді Мерц.
Ол Германияның көмекті жалғастыруға дайын екенін Зеленскийге жеке өзі растайтынын айтты.
Неміс делегациясының құрамына Siemens Energy, Hensoldt, Diehl Defence, Quantum Systems және басқа да компаниялардың өкілдері кірді.
Негізгі жобалардың бірі дрондарды ұстап қалуға арналған арнайы ұшқышсыз аппараттарды өндіру болмақ.
Германиялық Quantum компаниясы жоғары жылдамдықпен ұшатын соққы дрондарына қарсы қолданылатын мұндай аппараттарды бұған дейін сынақтан өткізген.
Бұған дейін Quantum мен украиналық WIY Drones бірлесіп Quantum WIY Industries кәсіпорнын құрған. Компания Strila атты дрон-ұстағышты және әуе қорғанысына арналған өзге де технологияларды әзірлеумен айналысады.
Тараптар 1000 шақырымнан астам қашықтыққа ұша алатын зымырандар мен өзге де қару түрлерін бірлесіп өндіру мәселесін талқылап жатыр.
Келіссөздер барысында Мерц Украинаның ішкі реформалары мәселесін де көтермек.
Атап айтқанда, Еуроодақтағы серіктестер жемқорлықпен күресте нақты қадамдардың жалғасуын күтеді.
Германия билігі қорғаныс саласындағы ынтымақтастық екі тарапқа да тиімді болғанын қалайды. Яғни бірлескен жобалар аясындағы технологиялар мен инвестициялардың бір бөлігі Германияға оралып, елдің маңызды инфрақұрылымын дрон шабуылдарынан қорғауға көмектесуге тиіс.
Мерцтің Украинаға сапары Ресейдің жаңа шабуылдары күшейген кезеңге тұспа-тұс келді.
Ресей Сыртқы істер министрлігі бұған дейін Мәскеудің Украинадағы нысандарға соққы жасауды жалғастыратынын мәлімдеп, мұны Украина тарапынан Ресей аумағына жасалған шабуылдарға жауап деп түсіндірген.
Зеленский өз кезегінде Украина Ресейдің мұнай өңдеу зауыттарына соққыларды күшейтетінін айтты. Оның сөзінше, бұл – Украина энергетикасы мен басқа да инфрақұрылым нысандарына жасалған шабуылдарға жауап.
Бұған дейін Мерц Берлинде Мәскеу қазір Украинадағы соғысты тоқтатуға бағытталған байыпты келіссөздерге дайын емес деген пікір білдірген.
Бұл мәлімдеме Қазақстан президенті Қасым-Жомарт Тоқаевпен өткен бірлескен баспасөз мәслихатында айтылды.
