Ресей, АҚШ және Украина арасындағы үшжақты келіссөздер қараша айының бірінші жартысында Абу-Дабиде өтеді. Кездесудің негізгі тақырыптарының бірі бейбіт келісім жасалғаннан кейін Ресей мен Украинаның қауіпсіздігін қамтамасыз ету мәселесі болмақ. Бұл туралы Ресей президентінің баспасөз хатшысы Дмитрий Песков мәлімдеді, деп хабарлайды Ulysmedia.kz.
Келіссөздерге кімдер қатысады
Песковтың айтуынша, алғашқы раунд қатаң түрде үшжақты форматта өтеді. Алайда кейінгі талқылауларға басқа елдер де қосылуы мүмкін.
— Қараша айының бірінші жартысына жоспарланған Абу-Дабидегі келіссөздер үшжақты форматта өтеді. Одан кейінгі талқылауларға кімдер қатысатынын айту қиын. Еуропалық қауіпсіздік архитектурасын басқа қатысушыларсыз талқылау мүмкін емес екені анық. Бірақ әңгіме алдымен үшжақты форматта басталады, — деді Песков.
Оның сөзінше, Ресей мен Украинаның қауіпсіздігіне қатысты мәселелер бейбіт реттеудің негізгі бағыттарының бірі болады. Бұл мәселелер шешілмейінше, ортақ келісімге қол жеткізу мүмкін емес.
Песков Еуропалық одақ өкілінің келіссөздерге қатысуы Брюссельдің ұстанымына байланысты екенін де айтты.
Келіссөздер неге тоқтап қалды
Ресей, Украина және АҚШ бұған дейін үш рет келіссөз өткізген. Кездесулер 23-24 қаңтарда, 4-5 ақпанда және 17-18 ақпанда өтті.
Келесі кездесуді наурыз айының басында Абу-Дабиде өткізу жоспарланған еді. Алайда АҚШ Иранға қарсы әскери операция бастағаннан кейін келіссөздер кейінге қалдырылды.
Контекст
Бұған дейін Владимир Путин Ресейдің үшжақты келіссөздерді қайта бастауға дайын екенін мәлімдеген. Оның айтуынша, қауіпсіздік мәселелерін қысқа мерзімді бітімнен кейін емес, түпкілікті бейбіт келісім жасалған соң талқылау қажет.
