Әлеуметтік желілерде Екібастұздағы жылу электр орталығының толық істен шыққаны туралы ақпарат тарады. Бұл мәлімет шындыққа жанаспайды, деп хабарлайды Ulysmedia.kz Екібастұз қаласы әкімдігінің баспасөз қызметіне сілтеме жасап.
«18 ақпанда сағат 16:30-дағы жағдай бойынша Екібастұз ЖЭО желілік су құбырындағы зақым жойылды. Бұл ретте күні бойы станцияның жұмысы тоқтаған жоқ және төмендетілген параметрлерде жұмысын жалғастырды, 3 қазандық жұмыс істеп тұрды. Павлодар облысының әкімі Асайын Байханов пен Энергетика министрлігі Атом және энергетикалық қадағалау комитетінің төрағасы Сұңғат Есімханов - Екібастұзда. ЖЭО-ың мамандары қаланы жылумен жабдықтауды қалпына келтіру үшін барлық қажетті шараларды қабылдауда. Станцияның үздіксіз жұмысын қамтамасыз ету және параметрлерді тұрақтандыру үшін тәулік бойы негізгі және қосалқы жабдықтарды жөндеу жұмыстары жүргізіледі», - делінген Екібастұз қаласы әкімдігінің Іnstagram-дағы ресми парақшасында жарияланған хабарламада.
Құзырлы орган мәліметінше, жөндеу жұмыстарын жүргізу үшін 140 адам жұмылдырылған. Сонымен қатар, Екібастұз қаласының әкімдігі тұрғындарды тек ресми ақпарат көздеріне ғана сенуге шақырды.
