Абай облысында прокуратура аудандық әкімдіктің заң бұзғанын анықтады. Жергілікті билік базар иелерінен сауда нысандарын орналастыру үшін жер телімдерін тегін беруді талап еткен. Прокурорлық тексеруден кейін бұл талаптың күші жойылды, деп хабарлайды Ulysmedia.kz.
Заңбұзушылық Мақаншы ауданында анықталған. Аудан әкімдігі уақытша сауда нысандарын орналастыратын орындарды белгілеу туралы қаулы қабылдаған.
Алайда құжатқа қосымша талап енгізілген. Оған сәйкес, базар иелері мұндай сауда нысандарын орналастыру үшін жер телімдерін ақысыз беруге міндеттелген.
Прокуратура бұл талапты заңсыз деп таныды. Өйткені ол кәсіпкерлердің құқығын бұзып, оларға заңда қарастырылмаған міндеттер жүктеген.
Прокуратура араласқаннан кейін әкімдіктің қаулысы күшін жойды.
Сонымен қатар, құжатты әзірлеуге жауапты болған кәсіпкерлік бөлімінің басшысы әкімшілік жауапкершілікке тартылды.
Ол Қазақстанның Әкімшілік құқықбұзушылық туралы кодексінің 173-бабының 1-бөлігі бойынша, яғни кәсіпкерлік қызметке заңсыз араласқаны үшін жазаланды.
