Қырғызстанда жоғары лауазымды мемлекеттік және жергілікті билік қызметкерлерінің жұмыс тәртібі өзгерді. Енді шенеуніктер негізгі қызметінен бөлек, сабақ беріп, ғылыми зерттеу жүргізіп, сарапшылық жұмыспен айналысып, қосымша табыс таба алады. Сондай-ақ, олардың келісімінсіз еңбек демалысынан мерзімінен бұрын шақыруға тыйым салынды. Тиісті жарлыққа Қырғызстан президенті Садыр Жапаров қол қойды, деп хабарлайды Ulysmedia.kz.
Жаңа талаптар мемлекеттік саяси, арнаулы мемлекеттік және муниципалдық саяси лауазымдарды атқаратын қызметкерлерге қатысты.
Енді олар негізгі жұмысымен қатар сабақ беріп, ғылыми зерттеулер жүргізе алады. Сондай-ақ, өз мамандығы бойынша сарапшылық және шығармашылық жұмыспен айналысуына рұқсат етіледі.
Алайда бұл шенеуніктер қалаған жерінде қосымша жұмыс істей алады деген сөз емес. Ақылы қызметпен айналысу үшін оларды лауазымға тағайындаған адамның рұқсаты қажет.
Оның үстіне қосымша жұмыс негізгі қызметіне кедергі келтірмеуі, жұмыс сапасына әсер етпеуі және мүдделер қақтығысына әкелмеуге тиіс.
Қосымша табыс тек заңда рұқсат етілген көздерден түсуі керек.
Тағы бір өзгеріс шенеуніктердің еңбек демалысына қатысты.
Енді басшы қызметкердің келісімінсіз оны демалыстан мерзімінен бұрын жұмысқа шақыра алмайды.
Бұл ретте қызметкердің келісімін міндетті түрде жазбаша алудың қажеті жоқ. Оны телефон арқылы, электрон байланыс құралдарымен немесе басқа да жолмен алуға болады.
Ал демалыстың пайдаланылмаған күндері үшін олардың санына қарай ақшалай өтемақы төленеді.
Шенеуніктерге қоғамға пайдалы істермен айналысуға да мүмкіндік берілді.
Олар денсаулық сақтау, білім беру, қайырымдылық, еріктілік және басқа да әлеуметтік салаларды дамытуға бағытталған ұйымдардың жұмысына қатыса алады.
Сонымен қатар, осындай ұйымдардың қызметіне қатысты шешімдерді әзірлеуге, талқылауға және қабылдауға атсалысуына рұқсат етілді.
Алайда коммерциялық емес ұйымдарда басшылық қызмет атқаруға қатысты бұрынғы шектеулер сақталады.
Атап айтқанда, шенеуніктерге, жалпы ереже бойынша, мұндай ұйымдардың басқару органдарына, қамқоршылық және байқау кеңестеріне мүше болуға тыйым салынады.
Дегенмен заңнамада немесе халықаралық шарттарда арнайы қарастырылған жағдайда бұл талаптан ерекшелік жасалуы мүмкін. Сондай-ақ Қырғызстан президенті немесе Министрлер кабинеті төрағасының келісімімен аталған ұйымдардың басқару жұмысына қатысуға рұқсат берілуі мүмкін.
