ҚР Ұлттық банкінің Ақша-несие саясаты комитеті базалық мөлшерлемені жылдық 16,75% деңгейінде қалдыру туралы шешім қабылдады. Бұл туралы Ulysmedia.kz хабарлайды.
Ұлттық банк бұл шешімнің жаңартылған болжамдар, деректерді талдау және инфляциялық тәуекелдердің теңгерімін бағалау негізінде қабылданғанын айтты.
"Сыртқы ортаның инфляцияға қарсы қысымы бәсеңдейді. Әлемдегі инфляция, атап айтқанда, сауда-саттық бойынша серіктес-елдердегі инфляция энергия мен азық-түлік тауарларына әлемдік бағаның төмендеуі нәтижесінде күтілетін бәсеңдеуді көрсетеді. Бұл дегеніміз – экономикалық өсім аясындағы сыртқы бағалардың өсуінің бәсеңдеуі. Тұрақты нақты айырбас бағамы елдегі инфляцияның бәсеңдеуі үшін қолайлы жағдай жасайды», - делінген хабарламада.
2023 жылғы сәуірде жылдық инфляция бәсеңдеуін жалғастырып, 16,8%-ды құрады. Инфляция құрылымында азық-түлік құрамдас бөлігі жылдамырақ қарқынмен баяулайды. Бұл ретте жылдық инфляцияның төмендеуін жанар-жағармай құнының өсуіне байланысты аздап үдей түскен азық-түлік емес тауарлар бағасының өсуі тежеді.
Айлық инфляция бұрынғы орташа деңгейден жоғары қалыптасуды жалғастыра отырып, 0,9% деңгейінде қалды. Алайда, 2022 жылдың қыркүйегінен бастап базалық және маусымдық түзетілген инфляция төмендеді, бұл инфляцияның тұрақты бөлігінің және инфляцияға қарсы қысымның біртіндеп әлсіреуін көрсетеді.
