ҚР Ішкі істер министрлігі отбасылық зорлықшыларды өз үйлерінен қууды ұсынады, деп хабарлайды Ulysmedia.kz.
Әкімшілік полиция комитеті басқармасының бастығы Руслан Қаржаспеков 1 шілдеден бастап елде тұрмыстық зорлық-зомбылық үшін жауапкершілік күшейтілгенін еске салды.
Содан бері құқық қорғау органдарына осындай фактілер бойынша 27 мың өтініш келіп түскен, оның 8%-ы есептен шығарылған.
"1 шілдеге дейін олардың үлесі 60% болды. Енді әкімшілік іс қозғалады, бұл тұрмыстық жанжалдар туралы өтініштердің 92%-ын құрайды", – деді ол.
Қаржаспеков ведомство заңнамаға жаңа түзетулер енгізетінін айтты.
Отбасылық зорлықшыларды қоғамдық жұмыстарға жегу және үйлерінен қуу жоспарланып отыр. Сондай-ақ, ІІМ оларға ішімдік ішуге тыйым салғысы келеді және психокоррекциялық тренингтерден міндетті түрде өтуді енгізбек.
Бүгінгі таңда материалдық немесе өзге де тәуелділіктегі адамдарға дене жарақаты фактілері бойынша 49 сотқа дейінгі тергеу басталды.
Сот шешімі бойынша 6 мың құқық бұзушы қамауға алынды. Сондай-ақ, сотта 13 мың отбасы татуласты.
Айта кетейік, бұдан бұрын депутат Амантай Жарқынбек тұрмыстық жанжал туса, ерімен бірге әйелін де қамауға алу керегін мәлімдеген.
«Мынаны түсінуіміз керек: біздің еліміз, біздің жеріміз өте үлкен аумақты қамтиды. Бізде оңтүстік пен солтүстіктің, шығыс пен батыстың менталитеті бір-біріне ұқсай бермейді. Осы өңірлердің жастары бір-бірімен отбасы құрады. Әртүрлі тілде сөйлеп, әртүрлі ұстанымда болады. Олар отбасы болып қалыптасқанша, ұрыс-керіс те орын алады. Ыдыс-аяқ сылдырламай тұрмайды. Әр ыдыс-аяқ сынған сайын күйеуін апарып қамап тастайтын болсақ, көпшілігі қайтадан отбасы бола алмай, қосылмай кетеді», - деді ол.
Жуырда Human Rights Watch халықаралық құқық қорғау ұйымы Қазақстанда тұрмыстық зорлық-зомбылықтың алдын алу үшін жеткілікті күш-жігер қабылданбағаны, ал депутаттарға әйелдерді жазалау туралы ойларын айтуға мүмкіндік берілгені үшін ел билігін сынға алды.
