3 желтоқсанда Nazarbayev University-де өткен баспасөз конференциясында университетке оқуға түсу ережелері өзгергені хабарланды. Енді талапкерлер үшін бұл үдеріс қолжетімдірек болмақ. Ulysmedia.kz тілшісі енгізілген өзгерістердің абитуриенттерге тигізер пайдасын бағалады.
МӘН-ЖАЙЫ
Айта кетейік, Times Higher Education 2024 жылғы беделді рейтингінің нәтижесі бойынша Nazarbayev University Қазақстан мен Орталық Азиядағы ең үздік университет мәртебесін алды. Жоғары халықаралық баға мектеп түлектерін де, олардың ата-аналарын да қызықтырып отыр. Себебі олар балаларын сапалы біліммен қамтамасыз етуді қалайды.
Nazarbayev University (NU) вице-президенті Әсел Уәлиева коммерциялық негізде оқуға түсу рәсімдерін жеңілдету туралы шешім қабылданғанын айтты. Бұл Қазақстан мен басқа елдердің студенттеріне сапалы білімге қол жеткізуге мүмкіндік береді. Сонымен қатар, бұл өзгерістер болашағы зор түлектерді елде қалдыруға ықпал етпек.
«Қазақстаннан шамамен 80-90 мың студент шетелде білім алып жүр. Біз өз студенттері шетелде оқитын елдердің алғашқы ондығына кіреміз. Егер рейтингтер бойынша төмен университеттерде оқу үшін шетелге барудың қажеті болмаса, неге осында оқымасқа? Сол себепті біз оқуға түсу шарттарын қайта қарадық», – деп түсіндірді Уәлиева.
Бұл жолы NU коммерциялық негізде оқуға түскісі келетіндер үшін ҰБТ нәтижелерін қабылдайды. NUFYP бағдарламасы түлектерге математика, академиялық ағылшын және басқа да пәндер бойынша білімдерін жақсартуға көмектеседі.
Маңыздысы: осы жылы NU-ға коммерциялық негізде тек күзгі семестрге ғана емес, көктемгі семестрге де түсуге болады. Бұл мектепті аяқтап, құжаттарын уақытылы тапсырмаған немесе басқа университеттен ауысуды жоспарлаған талапкерлер үшін өте маңызды.
Талаптар бағдарламаларға байланысты өзгеруі мүмкін. Жалпы, магистратура үшін IELTS минимумы – 6.0, докторантура үшін – 6.5.
NU-дың студенттер ісі және халықаралық ынтымақтастық жөніндегі вице-президенті Қадиша Даирова журналистердің сұрақтарына жауап бере отырып, енгізілген өзгерістерге қарамастан, университеттегі білім сапасы төмендемейтінін айтты.
«Біз бүгінгі жетістіктерімізді жоғары бағалаймыз. Рейтингімізді одан әрі көтеру үшін жұмыс істейтін боламыз. Сапалы білім – біздің басты басымдығымыз болып қала береді», – деді ол.
2025-2026 академиялық жылға онлайн-өтінімдерді қабылдау қазірдің өзінде басталды. Толық ақпарат Nazarbayev University-дің ресми сайтында қолжетімді. Оқу ақысы таңдалған бағдарламаға байланысты жылына 5 миллион теңгеден басталады.
Nazarbayev University келесі бағыттар бойынша білім алуға мүмкіндік береді: мұнай-газ ісі, инженерия, компьютерлік ғылымдар және робототехника, жаратылыстану ғылымдары, медицина, әлеуметтік және гуманитарлық ғылымдар, білім беру, бизнес және экономика, мемлекеттік басқару.
NU білім беру мүмкіндіктерінің тізімін белсенді түрде кеңейтуде. Ең қызықты бағдарламалардың бірі – медицина саласындағы алты жылдық бакалавриат бағдарламасы. Бұл бағдарлама екі диплом алуға мүмкіндік береді: медициналық ғылымдар бакалавры (BMS) және медицина докторы (MD). Биыл Бизнес жоғары мектебі алғаш рет бизнес-әкімшілік бағдарламасына бакалавриатқа қабылдауды бастады, ал Мемлекеттік саясат жоғары мектебі онлайн форматтағы магистратура бағдарламасын іске қосты.
Университеттегі оқу ағылшын тілінде өтеді, сонымен қатар қазақ тілі бойынша міндетті курстар қарастырылған. Оқытушылар құрамының 70%-ы АҚШ, Ұлыбритания, Канада, Оңтүстік Корея және басқа да елдердің профессорлары.
NU студенттерге өз таланттарын көрсету үшін үлкен мүмкіндіктер ұсынады: университетте спорт, шығармашылық, ғылым және басқа да қызығушылықтар бойынша 150-ден астам студенттік клуб жұмыс істейді. Кампус – бұл студенттерге арналған барлық инфрақұрылымы бар шағын қала. Барлық ғимараттар арнайы дәліздермен (скайуок) қосылған. Студенттерге олимпиадалық стандарттағы бассейні бар спорт орталығы да қолжетімді.
Times Higher Education (THE) World University Rankings 2024 рейтингінде NU әлемдегі зерттеу университеттерінің үздік 24–29%-ы қатарына кіреді. Орталық Азия бойынша – бірінші, ТМД елдері университеттері арасында – бесінші орында. NU әлемнің жас университеттері рейтингінде 106-орында, Азия университеттері рейтингінде 109-орында.
NU түлектері Meta, Google, Apple, Microsoft сияқты IT-алпауыттарда, қазақстандық және халықаралық жетекші компанияларда жұмыс істейді. Университет түлектерінің 98%-ы жұмыспен қамтылғанын мәлімдейді.
