Ғалымжан Қойшыбаев қайтадан Қазақстан Республикасы премьер-министрінің орынбасары – үкімет аппаратының басшысы болып тағайындалды, деп хабарлайды Ulysmedia.kz.
Толығырақ
Тиісті жарлыққа Президент Қасым-Жомарт Тоқаев қол қойды. Осылайша, Қойшыбаев вице-премьер қызметін сақтап, үкімет аппаратына басшылық етуді жалғастырады.
– Ғалымжан Тельманұлы Қойшыбаев Қазақстан Республикасы Премьер-Министрінің орынбасары – Үкімет Аппаратының Басшысы лауазымына тағайындалсын, – делінген құжатта.
Дипломатиялық мансабы және үкіметтегі қызмет жолы
Ғалымжан Қойшыбаев 1968 жылғы 12 сәуірде Қызылорда қаласында дүниеге келген. 1991 жылы М. В. Ломоносов атындағы Мәскеу мемлекеттік университетін тәмамдап, кейін осы университеттің аспирантурасында білім алған. Оның дипломатиялық дәрежесі – 2-сыныпты төтенше және өкілетті уәкіл.
Қойшыбаевтың еңбек жолының басым бөлігі дипломатия және мемлекеттік басқару салаларымен байланысты. Ол Қазақстанның Ресейдегі, Литвадағы, Латвиядағы, Эстониядағы және Финляндиядағы елшісі қызметін атқарып, сыртқы істер министрінің орынбасары болды. 2019 жылы Премьер-министр Кеңсесін басқарды, ал 2023 жылғы қаңтардан бері Қазақстан Республикасы премьер-министрінің орынбасары – үкімет аппаратының басшысы қызметін атқарып келеді.
Контекст
Бұған дейін Ерлан Қариннің Қазақстанның вице-президенті болып тағайындалғаны, ал Олжас Бектеновтің премьер-министр қызметінде қалғаны белгілі болды. Бұл кандидатураларды Тоқаев Құрылтай депутаттарының қарауына ұсынған.
Сондай-ақ Ғизат Нұрдәулетов Қауіпсіздік кеңесінің хатшысы қызметінен босатылды. Ол бұл қызметті 2023 жылғы қыркүйектен бері атқарып келген. Оған дейін Қазақстанның Бас прокуратурасын басқарған.
Аида Балаева Қазақстан Республикасы Қауіпсіздік кеңесі төрағасының орынбасары қызметіне тағайындалды.
Ал Ринат Мұхаметқали Президент әкімшілігінің жалпы бөлімінің меңгерушісі болып тағайындалды.
Мұхтар Тілеуберді қайтадан сыртқы істер министрі болды.
3 қыркүйекте Дәурен Қосанов қорғаныс министрі, ал Ержан Сәденов ішкі істер министрі қызметіне қайта тағайындалды.
