Құрылтай Конституциялық Соттың он судьясын тағайындауға келісім берді. Артынша Ақорда президенттің тиісті жарлығын жариялады. Тізімдегі кандидаттардың барлығы ресми түрде қызметіне кірісті, деп хабарлайды Ulysmedia.kz.
Толығырақ
Кандидаттарды Президент Әкімшілігінің басшысы Роман Скляр таныстырды.
Құрылтай Абдолла Сәкен, Қайрат Жақыпбаев, Ләйла Жақаева, Айжан Жатқанбаева және Айгүл Қыдырбаеваны Конституциялық Сот судьясы қызметіне тағайындауға келісім берді.
Сондай-ақ депутаттар Қанат Мусин, Бақыт Нұрмұханов, Сергей Скрябин, Аслан Тукиев және Сергей Ударцевтің кандидатураларын қолдады.
Құрылтай келісім берген кандидаттар кейін Президенттің жарлығымен Конституциялық Сот судьясы қызметіне тағайындалды.
Контекст
Конституциялық Сот – конституциялық бақылауды жүзеге асыратын және Конституцияның үстемдігін қамтамасыз ететін тәуелсіз мемлекеттік орган.
Сот Құрылтай қабылдаған заңдарды Президент қол қойғанға дейін, сондай-ақ Құрылтайдың қаулылары мен халықаралық шарттарды ратификацияланғанға дейін олардың Конституцияға сәйкестігі тұрғысынан қарайды.
Сонымен қатар азаматтар өздерінің конституциялық құқықтары мен бостандықтарына тікелей әсер ететін нормативтік құқықтық актіге қатысты Конституциялық Сотқа жүгіне алады.
