«Қазақстан Халқына» қоғамдық қоры аясында Қызылорда облысында бірқатар әлеуметтік жоба жүзеге асуда, деп жазады Ulysmedia.kz.
Мемлекет басшысының қолдауымен 2022 жылы "Қазақстан Халқына" қоғамдық қоры" құрылған болатын. Аталмыш қор құрылған сәттен бастап Қызылорда облысының әкімдігімен бірлескен түрде денсаулық сақтау, білім беру, әлеуметтік қолдау және оңалту салаларындағы күрмеулі мәселелерге қаржылай қолдау көрсету мақсатында талай жоба іске қосылған.
Аймаққа аталған бағытта соңғы екі жылда 3,0 млрд теңге қаржы бөлінген.
Жылжымалы медициналық кешен
Атап айтқанда, онкологиялық скрининг жүргізуге арналған құны 1,1 млрд теңгені құрайтын екі жылжымалы медициналық кешен өз жұмысына кірісті. Жылжымалы кешен алғаш рет табысталған республиканың үш өңірінің бірі ретінде Қызылорда облысы таңдалды. Кешен халықтың денсаулығындағы кінәратты ерте анықтаудың мүмкіндігін арттырады.
Бұл өз кезегінде, шалғай елді мекендердегі тұрғындардың жоғары мамандандырылған медициналық көмекке қолжетімділігін арттыруға, орташа өмір сүру жасын ұзартуға мүмкіндік береді.
Екі көліктен тұратын жылжымалы медициналық кешен томосинтез функциясы бар сандық маммографиялық жабдықпен, сарапшылық деңгейдегі ультрадыбыстық жүйемен және жоғары дәлдікпен зерттейтін компьютерлік томографпен жабдықталған. Екі құрал да Жапонияда жасалған. Мұндай кластағы және конфигурациядағы медициналық жабдық Қазақстанда алғаш рет қолданысқа берілуде.
«QH Денсаулық жолы» жобасы
«QH Денсаулық жолы» жобасының іске асырылуы онкологиялық ауруға шалдыққандарды ерте сатыда анықтауға мүмкіндік береді. Халықты онкологиялық скринингпен қамту бойынша қазіргі жоспар 60%-ды құрайды. Жобаны енгізу арқылы пилоттық өңірлер бойынша тексерумен қамтуды 70%-ға дейін ұлғайту көзделген.
Атап өту керек, жылжымалы кешен 22 қарашадан бастап, Байқоңыр қаласында өз жұмысын бастады. Ал, желтоқсан айының басынан Арал, Қазалы, Қармақшы, Жалағаш, Сырдария, аудандарына шығып, жыл аяғына дейін 2 мыңнан аса тұрғынды онкоскринингтен өтпеген мақсатты контингетті және де сақтандырылмаған азаматтарды жылжымалы медициналық кешеннің зерттеу түрлерімен қамту жоспарланып отыр.
Мобильді бригада құрамы 12 маманмен, атап айтқанда, онколог дәрігері, ультрадыбыстық зерттеу дәрігері, сәулелік диагностика дәрігері, рентген-лаборант және тағы басқа мамандарымен қамтылған.
