Жеті бизнес нысанына жайылған су кетпеген, деп хабарлайды Ulysmedia.kz порталы ҚР ТЖМ-ге сілтеме жасап.
ТЖМ не дейді
Министрліктің хабарлауынша, өткен тәулікте Атырау облысының Құлсары қаласында құтқарушылар арнайы құрылғылармен 200 мыңнан астам текше метр суды сорып шығарған. Сағат 14.00-де қалада 14 үй мен 7 бизнес нысанына әлі де су жайылып жатыр.
– Бұған дейін су тасқыны кезінде су тасқыны аймағында 2920 жеке тұрғын үй болған. Еріген қар суын сору жұмыстарын Маңғыстау, Алматы, Ақтөбе, Түркістан, Қызылорда облыстары мен Шымкент қаласынан келген ТЖМ қызметкерлері жүзеге асырып жатыр. Сондай-ақ, өңірде Жайық өзеніндегі су деңгейіне сағат сайын мониторинг жүргізілуде, – делінген хабарламада.
Айта кетейік, күні кеше облысқа ТЖ министрі Шыңғыс Әрінов келді. Өңірлік ТЖД жедел штабы отырысының қорытындысы бойынша ведомство басшысы Индер және Махамбет аудандарындағы елді мекендерге келетін суды жібермейтін бөгеттер маңына қосымша бақылау бекеттерін қоюды тапсырды.
Айта кетейік, бүгінгі таңда Атырау облысының эвакопункттерінде 504 адам, оның ішінде 280 кәмелетке толмаған бала бар.
Қазақстандағы су тасқыны
Еске сала кетейік, биыл бірнеше өңірді су тасып, ондаған ауданда төтенше жағдай жарияланды. Су тасқыны ең үлкен қауіп туғызып отырған өңірлер қатарында Атырау, Батыс Қазақстан, Солтүстік Қазақстан, Қостанай облыстары бар. Ресейдің Ор қаласында дамбының жарылуы қосымша қиындық туғызған. Құлсары қаласында ең күрделі жағдай тіркеліп, адам шығыны тіркелді.
Премьер-министр, штаб жетекшісі осы ретте Олжас Бектенов жауаптыларға бірқатар тапсырма берген.
Ulysmedia.kz редакциясының бас редакторы су тасыған Құлсарыға барып, арнайы репортаж түсірген болатын.
