Өскеменде бірнеше үйді кәріз суы басып қалды, деп хабарлайды Ulysmedia.kz.
Altaynews.kz-тің жазуынша, Куратов пен Машуков көшелерінің тұрғындары үйде тек резеңке етікпен жүре алады. Бақшаларды басқан су ғимараттарға да кірген.
Зардап шеккендердің сөзінше, бұл кәріз суының алғаш рет көтерілуі емес. Тұрғындар коммуналдық қызметтердің суды сору сорғанын күте алмай, өз беттерімен амалдаған. Олардың есебінше, бестен астам үйді су басқан.
Тасқынға кәріз коллекторындағы апат себеп болғаны анықталды.
"1 мамырда Өскемен қаласының оң жағалауынан ағынды суларды бұруды қамтамасыз ететін арынды кәріз коллекторында апатты жағдай орын алды. Қысым коллекторында жөндеу жұмыстары соңғы рет 2005-2009 жылдар аралығында жүргізілген. Авариялық учаскені ажыратылып, жұмыс резервтік құбырға ауыстырылады",-деп түсіндірді "Өскемен – Су арнасы".
Апат жойылғаннан кейін учаскелерден су сорылатыны хабарланды.
