Солтүстік Қазақстан облысында газ-ауа қоспасы жарылып, 12 жасар қыз қайтыс болды. 22 жастағы жігіт ауруханаға түсті, деп хабарлайды Ulysmedia.kz.
Төтенше жағдай Аққайың ауданы Смирново ауылында болды. Қазіргі уақытта екі қабатты тұрғын үйде жарылыстың салдары жойылып жатыр.
"8 желтоқсанда сағат 14:50-де Смирново ауданының орталығында екі қабатты үш кіреберісті тұрғын үйде жарылыс болғаны туралы ақпарат түсті. Пәтерде газ-ауа қоспасы жарылып, 60 шаршы метр алаң өртенген. Терезелер шағылып, ғимаратқа зиян келген", - деп хабарлады облыстық ТЖ департаментінің баспасөз қызметі.
Оқиға салдарынан 2011 жылы туған қыз қайтыс болып, 2001 жылы туған ер адам зардап шекті. Ол орталық аудандық ауруханаға жатқызылды.
Үйден тоғыз адам эвакуацияланды. Қайғылы оқиғаның себебі анықталып жатыр.
