Ресейден тасыған су кез келген сәтте келуі мүмкін – Жайықта не болып жатыр

Батыс Қазақстан облысының әкімдігі су тасқынына байланысты Орал тұрғындарына ескерту жасады.

Әкімдік не дейді?

– Алдағы екі-үш күнде Ресей Федерациясының Ириклин су қоймасынан келетін судың үлкен көлеміне байланысты Жайық өзенінің деңгейі көтерілуі мүмкін. Қазір Жайық өзеніндегі су деңгейі 8 метрге жақындап келеді, қауіпті деңгей – 8,5 метр.

Су тасқынына қарсы іс-шараларға 350 бірлік арнайы техника және 2 мыңға жуық адам жұмылдырылды. Сондай-ақ, көмекке облыстың басқа өңірлері мен аудандарынан әскери қызметшілер, ТЖД қызметкерлері мен еріктілер келді", - деп хабарлады әкімдік.

Эвакуация

Әкімдік Жайық өзенінің жайылмасында, Курени, Старица және Коминтерн ауданында орналасқан саяжай алаптарының тұрғындарын шұғыл эвакуациялау қажет екенін хабарлады.

– Судың үлкен көлемі кез келген уақытта келіп, үйлеріңізді басуы мүмкін. Өз өміріңізге және жақындарыңыздың өміріне қауіп төндірмеңіз, бірақ шұғыл түрде туыстарыңызға, достарыңызға немесе тәулік бойы жұмыс істейтін эвакуациялық пункттерге көшіңіз, - деп ескертті әкімдік.

ТЖМ

Сонымен қатар, ТЖМ "Курени", "Жас натуралистер станциялары", "Коминтерн", "Шаған жағалауы", "Старички", "Круглоозерное", "Телеорталық (мәдениет және демалыс саябағының артында)"мекенжайлары бойынша инертті материалмен қаптарды төсеу және жағалауды нығайту бойынша су тасқынына қарсы жұмыстар жүргізіліп жатқанын хабарлады.