Бұған дейін Қуандық Бишімбаев ісіне қатысты сот процесінің келесі жарыссөздер екенін судья Айжан Құлбаев мәлімдеген. Жарыссөз деген не? Онда тараптар не істейді? Кімнің қандай құқығы бар? Ulysmedia.kz. анықтауға тырысты.
Зерттелмеген материалдарға сілтеме жасауға болмайды
Сот тергеуі аяқталғаннан кейін судья сот жарыссөздеріне көшу туралы хабарлайды және қатысушыларға өз сөздерінде сот отырысында зерттелмеген материалдарға сілтеме жасауға құқығы жоқ екенін түсіндіреді.
Қылмыстық іс бойынша тараптардың жарыссөздері-сот талқылауының дербес кезеңі. Бұл кезең айыптаушының, жәбірленушінің немесе оның өкілінің, азаматтық талапкердің және азаматтық жауапкердің немесе олардың өкілдерінің, сотталушы мен қорғаушының сөздерінен тұрады.
Тараптардың әрқайсысы істің мән-жайларына, зерттелген дәлелдемелерге құқықтық ұстанымын негізге ала отырып, олардың салыстырмалылығы, жол берілуі мен жеткіліктілігі тұрғысынан өз талдауын баяндайды.
Уақытпен шектей алмайды
Сот сот жарыссөздерінің ұзақтығын белгілі бір уақытпен шектей алмайды, бірақ судья жарыссөзге қатысатын адамдарды, егер олар қаралатын іске қатысы жоқ мән-жайларға қатысты болса не сот отырысында зерттелмеген дәлелдемелерге негізделсе, тоқтатуға құқылы.
Сот жарыссөздерінің барлық қатысушылары сөз сөйлегеннен кейін олардың әрқайсысы тараптар өкілдерінің сөйлеген сөздеріне қатысты қысқаша қарсылықтармен немесе ескертулерментағы бір рет сөз сөйлеуге құқылы.
Барлық жағдайларда соңғы ескерту құқығы сотталушыға және оның қорғаушысына тиесілі.
Жарыссөздер 29 сәуірден басталады. Және 30 сәуір күні, 2, 3 мамыр күндері де жалғасады. 4 мамыр күні де болып қалуы мүмкін.
Бишімбаевтың ісі
Еске сала кетейік, Астана қаласының қылмыстық істер жөніндегі ауданаралық сотында экс-министр Қуандық Бишімбаевтың ісі бойынша алдын ала тыңдау 11 наурызда басталды. Прокурор экс-министр ісінің мән-жайын айтып берді.
Ал Бишімбаев тағылған айыпты мойындамай, ашық сот өткізуді сұрайды. Оған "қинау" (110-баптың 2-бөлігі) және "аса қатігездікпен адам өлтіру" (99-баптың 2-бөлігі) баптарымен айып тағылған. Бұған қоса, Астанадағы "Гастро-орталық" директоры, Бишімбаевтың туысы Бақытжан Байжанов Салтанат Нүкенованың өліміне байланысты іс бойынша "қылмысты жасырды" деген күдікпен сотқа тартылып жатыр.
12 наурызда экс-министр Қуандық Бишімбаевтың ісі бойынша алдын ала тыңдау жалғасты. Бұл жолы да журналистер сот залына кіре алған жоқ. БАҚ тарапының базынасын сот қызметкерлері тыңдаған болғанымен, ешбір журналист сот залына кіре алмаған. Тіпті тілшілер полиция шақырып, сот әкімшілігі ақпарат алу құқығынан айырып отырғаны жөнінде арыз жазуына тура келген.
4 сәуір күнгі сотта Қуандық Бишімбаевтың адвокаты Лейла Рамазанова бүгінгі сотқа Салтанат Нүкенованың денесіне жасалған сараптаманы жарамсыз деп тану қолайсыз деп тану жөнінде өтініш білдірген. Судья бұл өтінішті қанағаттандырудан бас тартқан. Ал Бишімбаевтың өзі тергеу изоляторында өз-өзіне қол жұмсамақ болғанын мәлімдеді.
Прокурор Айжан Аймағанова Қуандық Бишімбаевтан ұрып-соққан жұбайына жедел жәрдем шақырудың орнына неге көріпкелге қоңырау шалғанын сұраған. Бишімбаев “бұл менің үлкен қателігім болды” деп жауап берді.
Алдын ала тыңдаудан кейінгі соттарға журналистер кіруге мүмкіндік алды. Сот барысы Қазақстан Республикасының Жоғарғы сотының ресми сайтынан тікелей эфирден көрсетіледі.
