Қазақстанның кәсіпқой боксшысы, WBO және IBF нұсқалары бойынша орта салмақтағы әлем чемпионы Жәнібек Әлімханұлы өзінің келесі қарсыласын таңдады, деп хабарлайды Ulys Sport.
Boxingscene.com ақпаратына сәйкес, боксшының қарсыласы – WBC-дің сол салмақтағы "уақытша " чемпионы, доминикандық Карлос Адамес (23-1, 18 KO).
Екі боксшының арасындағы шиеленіс бірнеше күн бойы әлеуметтік желілерде жалғасып келеді. Енді олар рингте кездеспек. Егер бұл ақпарат расталса, олардың жекпе-жегінде төрт титул сарапқа салынады.
Екі боксшы да кейінгі жекпе-жегін былтыр өткізген: Адамес маусым айында тоғызыншы раундта америкалық Джулиан Уильямсты (29-4-1, 17 КО) жеңген. Әлімханұлы қазан айында алтыншы раундта неміс Винченцо Гуальтиериді (21-1-1, 7 КО) жеңіп, одан IBF титулын тартып алды.
