×
474.83
518.99
5.4
#қаңтар қақтығысы #Украинадағы соғыс #жемқорлық #тағайындау
474.83
518.99
5.4

«Алладан сұраңыз»: Бозымбаев келесі жылы тасқын бола ма деген сұраққа жауап берді

25.06.2024, 12:42
Фото: Ашық дереккөзден

Үкімет басшысының орынбасары Қанат Бозымбаев "келесі жылы су тасқынына ел билігі дайын ба?" деген сұраққа жауап берді, деп хабарлайды Ulysmedia.kz.

Үкіметтегі брифингте журналист “сіз су тасқынына қарсы күресу, халықты баспанамен қамтамасыз ету мәселесін шешу үшін Ақордадан (Үкіметке) жіберілгеніңіз рас па?” деп сұраған. Қанат Бозымбаев жымиып, “мұндай сұраққа комментарий беруі қиын” екенін жеткізді.

– Бірақ ең басты мақсат осы болған шығар. Үкіметімізге көмектесіп, тәжірибе жинақтап, тиісті әкімшіліктерге координация жасап, көмек көрсеттім, – дейді ол.

Журналист “Роман Склярдың қолынан келмеген проблемаларды менің қолымнан келеді деп санайсыз ба?” деп сұраған. 

– Мен ондай сөзді айтқан емеспін. Ешқашан олай айта алмаймын. Әріптесімнің (жұмысына) баға бере алмаймын. Бұл менің құзыретіме жатпайды. Провокациялық сұрақтарды маған қоймаңыздар, – деді ол.

“Келесі жылы су тасып, азаматтар үйінен айырылуы мүмкін бе? Солай болса отставкаға кетуге дайынсыз ба?” деп те сұралған.

Бұл сұраққа жауап берген Бозымбаев “отставкаға кетуге қашан да дайын екенін, ал қазір көмектесіп, баспанасыз қалған кісілерді үймен қамтамасыз етеміз деп, бас күш-жігерімізді жіберіп жатырмыз” деді. 

– Осындай апаттардың алдын алатын жүйе жасаймыз деп, тырысып жатырмыз, – деді ол.

“Үкіметтің осы бағыттағы жұмысын үйлестіретін адам ретінде сіз келесі жылы елімізде осындай алапат су тасқыны болмайды деп уәде бере аласыз ба?” деген сұраққа Бозымбаев “оны кім біледі? Алладан сұраңыз” деп жауап берді.

Сұраққа Бозымбаев кейін қайта оралды

– Егер монолог айтқыларыңыз келсе, айтыңыздар. Тыңдайық. Дұрысырақ сөйлейік. Қандай сұрақ қойсаңыздар – сондай жауап аласыздар. Егер білікті сұрақ қойсаңыздар, дұрыс жауап беремін. “Келесі жылы су тасыса отставкаға кетесіз бе?” деп хайпажорлық сұрақ қойылды. Келесі жылы ауа температурасы қандай болатынын, қанша қар түсетінін кім біледі? Ондай болжамды ешкім айта алмайды. Егер сол кезде үлкен шығын болып, тиісті шара қабылдай алмасам отставкаға дайынмын! Үкіметте көп жұмыс істедім, әр лауазымда еңбек еттім. Тақырып бойынша, сұрақ қойыңыздар, ал хайпажор сұрақтарға тиісінше жауап беремін, – деді ол.

Қазақстандағы су тасқыны

Еске сала кетейік, биыл бірнеше өңірді су тасып, ондаған ауданда төтенше жағдай жарияланды. Су тасқыны ең үлкен қауіп туғызып отырған өңірлер қатарында Атырау, Батыс Қазақстан, Солтүстік Қазақстан, Қостанай облыстары бар. Ресейдің Ор қаласында дамбының жарылуы қосымша қиындық туғызған. Құлсары қаласында ең күрделі жағдай тіркеліп, адам шығыны тіркелді.

Премьер-министр, штаб жетекшісі осы ретте Олжас Бектенов жауаптыларға бірқатар тапсырма берген.

Ulysmedia.kz редакциясының бас редакторы су тасыған Құлсарыға барып, арнайы репортаж түсірген болатын.

Серіктес жаңалықтары