Шенеуніктер таратқан мәліметтерге қарағанда, Атырау өңірінде қарақұрт шағып, қырылған түйенің саны 63-ке жеткен, деп хабарлайды Ulysmedia.kz.
Қарақұрт шағып алғаннан кейін қырылған 63 түйеден бөлек, тағы 400-ге малға жәндіктің зияны тиген, деп жазады AtyrauPress.
Атырау облысының ауыл шаруашылығы басқармасы улы жәндіктер Индер, Исатай және Құрманғазы аудандарының құмды учаскелерінде көбейгенін растады.
Осы аудандарда қарақұрттың уынан 397 түйе ауырып қалған.
– Шаққан малды емдеу, өтемақы бюджетке енгізілмеген. Дегенмен, жергілікті ветеринарлар емдеуді жалғастырып жатыр. Сондай-ақ ауру және өлген жануарлардан сынамалар алынып, облыстық ветеринариялық зертханаға жіберілді, - делінген басылым жазбасында.
Сонымен қатар, шенеуніктер мал иелеріне улы жәндіктер жиі кездесетін жайылымдарда түйелерді, жылқыларды және сиырларды жаюдан бас тартуға және ауру белгілері бар жануарлар туралы жедел хабарлауға кеңес береді.
