Қасым-Жомарт Тоқаев Үндістан Премьер-министріне көңіл айту жеделхатын жолдады, деп хабарлайды Ulysmedia.kz.
Қасым-Жомарт Тоқаев Уттар-Прадеш штатының Хатрас қаласында болған қайғылы оқиғаға байланысты Үндістан Премьер-министрі Нарендра Модиге көңіл айтты.
“Уттар-Прадеш штатында өткен діни жиын кезінде көптеген адамның бастырылып, қайтыс болғаны туралы қайғылы хабарды терең күйзеліспен қабылдадым. Қазақстан халқының және өз атымнан қаза тапқан азаматтардың отбасыларына көңіл айтамын. Сондай-ақ зардап шеккендердің тезірек сауығып кетуіне тілектестік білдіремін,” – деп жазылған жеделхатта.
Уттар-Прадеш штатында 100-ден астам адамның қысылып қаза тапқаны белгілі болды. Бұқаралық ақпарат құралдары жазғандай, мұның бәрі діни іс-шара кезінде болған. Шатырда қатты ыстық болып шығар тұста адамдар қысылып өлген.
Қаза тапқандардың басым бөлігі әйелдер.
