Еліміздегі мемлекеттік электронды реестрдің дерегіне сәйкес «Е-лицензиялау» порталында 9 489 турагент пен 558 туроператор тіркелген, деп хабарлайды Ulysmedia.kz.
Туризм және спорт министрлігі Туризм комитеті туристік агенттікті таңдау бойынша ұсыныстар жариялады.
“ҚР ТСМ Туризм индустриясы комитетінің және жергілікті атқарушы органдардың интернет-ресурстарында туроператорлардың, турагенттердің, гидтердің, экскурсоводтардың және туризм нұсқаушыларының реестрі орналастырылған. Саяхатшы туристік компанияларға жүгінген кезде турагенттің қызметі туралы хабарламаны және туроператордың лицензиясы бар-жоғын тексере отырып, барлық қажетті құжатты талап етуге құқылы”, – деп жазылған хабарламада.
Министрлік өкілдері туристік кодтың болуына назар аудару қажет дейді.
“Туркод – әрбір туристке кепілдік ретінде туроператор беретін бірегей нөмір. Ол туроператор өз міндеттерін орындау мүмкін болмаған немесе орындамаған жағдайда туристті елге қайтаруды қамтамасыз ету мақсатында беріледі. Туристік өнімді сату кезінде туроператор алған қаражатты пайдалана отырып, турлардың электронды реестрі автоматты түрде туристік кодты береді”, – делінген хабарламада.
Туризм индустриясы комитеті турагенттердің, туроператорлардың, гидтердің, экскурсоводтардың және туризм нұсқаушыларының мемлекеттік электронды реестрін жүргізеді. Бұл олардың қызметін тұрақты бақылауға және барлық нормативтік талапты сақтауға жол ашады.
Айта кету керек, халықаралық әуе қатынасы 121 бағыт бойынша 28 елге орындалады.
