Солтүстік Корея Ресейге "Жеңіс күніне дейін" қолдау көрсетеді. Бұл туралы КХДР сыртқы істер министрі Цой Сон Хи Мәскеуде ресейлік әріптесі Сергей Лавровпен кездесуде мәлімдеді, деп хабарлайды Ulysmedia.kz.
КХДР ҚОЛДАУЫ
Ол Украинадағы соғыс басталғаннан бері Солтүстік Корея басшысы Ким Чен Ын "Ресей армиясы мен халқын үнемі және күшті қолдауға" нұсқау бергенін айтты.
Цой Сон Хи Ресейге Солтүстік Корея сарбаздарын немесе қару-жарақ пен оқ-дәрі жіберу туралы егжей-тегжейлі айтқан жоқ.
Сонымен бірге, Батыс дереккөздері Украинамен соғысқа қатысу үшін КХДР-дан Ресейге әскери бөлімшелер жіберілгенін хабарлады. АҚШ Мемлекеттік хатшысы Энтони Блинкеннің айтуынша, Курск облысында сегіз мыңға жуық Солтүстік Корея әскері бар. Ол Ресейге жіберілген КХДР әскери қызметшілерінің санын кем дегенде 10 мың адам деп санайды.
5,5 МЛРД ДОЛЛАР
Германияның Фридрих Науман қоры Украина соғысы басталғаннан бері Солтүстік Корея Ресейге шамамен 5,5 миллиард долларға қару-жарақ берді деп есептейді. КХДР әзірге әскери көмек көлемі туралы деректерді жариялаған жоқ.
Ал бүгін Оңтүстік Корея Солтүстік Корея Ресейге көмектескені үшін өтеуіне ядролық технологияны сұрайтын шығар деген болжам айтты.
