Павлодар облысында жантүршігерлік жол апаты болды, деп хабарлайды Ulysmedia.kz.
Облыстық полиция департаментінің мәліметінше, жол апатына қатысты қылмыстық іс қозғалды.
МӘН-ЖАЙ
Қайғылы оқиға 8 қаңтарда сағат 21-00-де "Павлодар-Семей" автожолында, Аққулы ауданы Тілектес ауылының маңында болған. Kia Sportage автомашинасының жүргізушісі қар жинайтын машинаны басып озған кезде қарсы қозғалыс жолағына шығып, КАМАЗ автомашинасымен бетпе-бет соқтығысқан.
ҚАЗА ТАПҚАНДАР БАР
Жол-көлік оқиғасы салдарынан жүргізуші мен екі жолаушы оқиға орнында қайтыс болды. Сондай-ақ, жарақаттармен ауруханаға Kia жолаушысы жатқызылды. Автокөліктер арнайы тұраққа қойылды.
Полиция департаменті мұндай оқиғалардың алдын алу үшін жол қозғалысына қатысушыларға жылдамдық режимін, әсіресе көлік көп жүретін жерлерде сақтау және көлік құралының техникалық жағдайын бақылау маңызды екенін еске салды.
