Алматыда қаласындағы Әл-Фараби даңғылының бойында болған жол апатынан 39 жастағы әйел қаза тапты, деп хабарлайды Ulysmedia.kz.
Таңғы 5:30-да Toyota көлігінің 20 жастағы жүргізушісі рөлге ие бола алмай жол жиегіндегі жаяу жүргіншіні қағып өтіп, артынша жарнама тақтайшасына соғылған.
Алматы полициясының хабарлауынша, оқиға бойынша қылмыстық іс қозғалды.
"Toyota маркалы автокөліктің 20 жастағы жүргізушісі Әл-Фараби даңғылымен батыс бағытта қозғалып бара жатып, Қаратаев көшесінің қиылысында рөлге ие бола алмай, жолдың солтүстік шетіне шығып кетіп бордюрге соғылған. Содан кейін қозғалысын жалғастырып, жаяу жүргінші жолына шығып кеткен. Онда ол 39 жастағы әйелді қағып, кейіннен жарнама тақтайшасының тірегіне соғылып көлігі аударылған", – деп хабарлады Алматы қаласының полиция департаменті.
Жүргізуші мен жолаушы ауруханаға жатқызылды.
