АҚШ-тың Халықаралық даму агенттігінің (USAID) штаб-пәтері жабылып, қызметкерлерге жұмысқа шықпау туралы ескерту жіберілді, деп хабарлайды Ulysmedia.kz.
USAID-тің Вашингтондағы штаб-пәтері агенттік басшылығының нұсқауымен жабылған. USAID-тің штаб-пәтерінде жұмыс істейтін қызметкерлер қашықтан жұмыс істейді. Тек негізгі қызмет көрсету міндеттерін атқаратын персонал ғана орнында жұмыс істеуі мүмкін.
БАСШЫЛЫҚ
CNN-нің мәліметінше, АҚШ мемлекеттік хатшысы Марко Рубио USAID директорының міндетін атқарушы болып тағайындалды.
- USAID-тің көптеген қызметі сақталады, бірақ олар америкалық сыртқы саясатқа сәйкес болуы керек, - дейді Рубио.
БҰҒАН ДЕЙІН
Еске салайық, АҚШ президенті Дональд Трамп бұған дейін USAID басшылығында алдағы уақытта өзгерістер болатынын мәлімдеген еді.
- Бұл агенттікке бір топ радикалдар-бассыздар басшылық етеді. Біз оларды жұмыстан босатамыз, содан кейін шешім қабылдаймыз, - деген болатын Трамп.
USAID азаматтық сыртқы көмек пен даму саласындағы ынтымақтастықты басқаруға жауапты. Тәуелсіз агенттіктің жылдық бюджеті 42,8 миллиард доллар.
