Солтүстік Коре басшысы АҚШ пен Батыс елдері қақтығысты созбалаңға салып отыр деп айыптады, деп хабарлайды Ulysmedia.kz.
КИМ ЧЕН ЫН НЕ ДЕЙДІ
Ким Чен Ын Пхеньян Солтүстік Корея мен Ресей арасындағы "жан-жақты стратегиялық серіктестік туралы шарттың рухына сәйкес өзінің егемендігін, қауіпсіздігін және аумақтық тұтастығын қорғау үшін Ресей армиясы мен халқының әділ ісін үнемі қолдайтынына" уәде берді. Ол сондай-ақ КХДР-ды, оның ядролық күштерін тежеудің барлық күшін жедел нығайтудың жаңа жоспары жасалып жатқанын, ал мемлекет ары қарай ядролық қаруды дамытудың мызғымас бағытын белгілегенін атап өтті.
Ким Чен Ынның сөзінше, АҚШ, Жапония және Оңтүстік Кореяның әскери одағы, сондай-ақ Корея түбегінде орналастырылған АҚШ-тың ядролық стратегиялық күштері аймақтағы тепе-теңдікті бұзады.
МӘСКЕУ МЕН ПХЕНЬЯН АРАСЫНДАҒЫ СТРАТЕГИЯЛЫҚ СЕРІКТЕСТІК
Былтыр Солтүстік Корея мен Ресей стратегиялық серіктестік туралы келісімді ратификациялаған. Ресей президенті Владимир Путиннің Пхеньянға сапары кезінде жасалған келісімде бір тарап қарулы шабуылға ұшыраған жағдайда екінші тарап “барлық қолда бар құралдарымен” әскери және басқа да көмек көрсетуі қарастырылған. Ізінше, Солтүстік Кореяның әскері Украинада соғысып жатқаны белгілі болды.
Сол тұста Оңтүстік Корея, АҚШ және Украина барлау қызметтері КНДР әскери қызметшілерінің Ресейге Украинаға қарсы соғысқа қатысу үшін жіберілгені туралы бірнеше рет хабарлаған. Пхеньянның мұндай әрекеті БҰҰ-ны алаңдатып, НАТО мен Еуропа одағы тарапынан сынға ұшырады. Сеул, Вашингтон және Киевтің мәліметтері бойынша, солтүстіккорей күштерінің бір бөлігі Украинамен шекаралас Курск облысына жіберілген. Сол уақытта Украина президенті Владимир Зеленский солтүстіккореялық әскери қызметшілер бұл аймақта шығынға ұшырағаны туралы мәлімдеді. АҚШ-тың Украинаға Ресейдің ішкері аймағына соққы жасауға мүмкіндік беретін ATACMS зымырандарын беру туралы шешімі Пхеньянға Ресейге жіберілген солтүстіккореялық күштердің қауіп алдында екенін білдіреді, деп жазды The New York Times газеті.
