Наурыздан бастап денсаулық сақтау, байланыс, көші-қон саласында өзгерістер болады, деп хабарлайды Ulysmedia.kz.
ҚАЗАҚСТАНДА 25 НАУРЫЗДАН БАСТАП ҰЯЛЫ ТЕЛЕФОНДАРДЫ ТІРКЕУ ЕРЕЖЕЛЕРІ ӨЗГЕРЕДІ
Қазақстандағы абоненттік құрылғылардың идентификациялық кодтарының дерекқор операторы (БДИК) жеке тұлғалар үшін 3 жұмыс сағатында, заңды тұлғалар үшін 6 жұмыс сағатында тіркеу мәліметтерін (ЖСН немесе БСН, абоненттік құрылғының идентификациялық коды, абоненттік нөмір) тексеруден өткізеді.
ЕСІРТКІГЕ ҚАРСЫ КҮРЕС
6 наурыздан бастап Қазақстанда есірткі өндіру және оның айналымын ұйымдастыру бойынша жаза күшейтіледі.
Есірткі өндіру, өңдеу және таратуға қатысқан лауазымды тұлғалар үшін жазалау шаралары қатаңдатылды. Енді кінәлілер 15 жылдан 20 жылға дейін немесе өмір бойына бас бостандығынан айырылады, сондай-ақ мүлкі тәркіленеді.
Сонымен қатар, есірткі тасымалдаушыларға ("закладчиктерге") қатысты жаза жұмсартылды. Олар 5 жылдан 8 жылға дейін бас бостандығынан айырылып, мүлкі тәркіленеді (бұрын 5-10 жыл болған). Алайда, егер олар бұл қылмысты бірнеше рет қайталаса, жаза 7 жылдан 12 жылға дейінгі мерзімге ұлғайтылады.
Есірткіні таратуға қатысқан лауазымды тұлғаларға арналған қылмыстық жауапкершілік те күшейтілді – олар енді 15 жылдан 20 жылға дейін сотталады, мүлкі тәркіленеді (бұрын 10-15 жыл болатын).
ДЕНСАУЛЫҚ САҚТАУ
2025 ЖЫЛДЫҢ 2 НАУРЫЗЫНАН БАСТАП ҚАЗАҚСТАНДА ЭЛЕКТРОНДЫ ИММУНИЗАЦИЯ ПАСПОРТЫ ЕНГІЗІЛЕДІ
Профилактикалық екпелер картасы Иммунизация паспортымен ауыстырылады.
Иммунизация паспорты тек электронды форматта жүргізіледі (бұрын екпе картасы қағаз және электронды форматта қатар жүргізілген).
Иммунизация паспорты қажеттілік жойылғанша сақталады. Ал екпе картасы 5 жыл сақталған.
ҚАНДАС ЖӘНЕ ҚОНЫС АУДАРУШЫЛАР
1 НАУРЫЗДАН БАСТАП ЕРІКТІ ҚОНЫС АУДАРУШЫЛАРҒА МАТЕРИАЛДЫҚ КӨМЕК КӨРСЕТУ ТӘРТІБІ ӨЗГЕРЕДІ
Материалдық көмек алу үшін қандас немесе қоныс аударушы аймақтық квотаға енгізілгені туралы шешім алып, жаңа мекенжайға қоныстануы тиіс.
Сондай-ақ, еңбек мобильдігін арттыру мақсатында ерікті қоныс аудару шараларына қатысқан тұлғалар, егер олар соңғы 36 ай ішінде некесін бұзған болса, азаматтық хал актілерін тіркеу кітабынан ажырасу туралы мемлекеттік тіркеу анықтамасын ұсынуы қажет.
