Азаматтық белсенді Александра Осипова 2025 жылғы 14 наурызда Гоголь, 29 мекенжайында өтеді деп жоспарланған бейбіт шеруді тоқтататынын мәлімдеді, деп хабарлайды Ulysmedia.kz.
ШЕРУ ӨТПЕЙТІН БОЛДЫ
Оның айтуынша, бұл шешімге қауіпсіздік мәселелері мен бақылаудан шығу қаупі түрткі болған.
"Бүгін мен 2025 жылғы 14 наурызға, сағат 18:05-19:00 аралығында Гоголь, 29 мекенжайында жоспарланған бейбіт шеруді ТОҚТАТАТЫНЫМДЫ хабарлаймын. Іс-шара ӨТКІЗІЛМЕЙДІ," – деді Осипова.
ҚАУІПСІЗДІК ҮШІН ШЕШІМ
Осипова соңғы күндері түрлі адамдардан көптеген қоңыраулар түсіп, олардың кейбірі қауіп төндіргенін жеткізді.
"Біз бар болғаны 99 қатысушыны тіркегенбіз, бірақ келгісі келетіндердің саны күрт өсіп келеді. Бұл жағдайдың бақылаудан шығуы мүмкін екенін білдіреді," – деп түсіндірді белсенді.
Оның айтуынша, әртүрлі топтар бұл шараға ерекше қызығушылық танытып отыр, әрі олардың қандай әрекетке бара алатынын ескермеуге болмайды.
"Мен 2022 жылдың қаңтарын, бейбіт шерулердің қалай хаосқа айналып, қайғылы салдарға әкелгенін ұмыта алмаймын," – деді ол.
ҚАУІПСІЗДІКТІ ҚАМТАМАСЫЗ ЕТУ МҮМКІН ЕМЕС
Осипова үшін ең бастысы – қатысушылардың қауіпсіздігі.
"Қазіргі жағдайда оны қамтамасыз ете алмаймын. Егер арандату немесе күтпеген жағдайлар орын алса, мен сіздерді қорғай алатындай жеткілікті дайындықтан өтпедім," – деп түсіндірді ол.
Белсенді соңғы уақытта жеке өміріндегі өзгерістерге байланысты байланысқа шыға алмай жүргенін де айтты.
"Отбасы, оқу, жұмыс, әлеуметтік желілерсіз күнделікті күйбең тіршілік. Бірақ азамат ретінде соттарда куәлік беру, арыз жазу сияқты белсенді әрекеттерді жалғастырдым," – деді Осипова.
ҚОҒАМҒА ҮНДЕУ
Барлық қауіп-қатерлерді таразылай отырып, Осипова шеруді тоқтату ең дұрыс шешім деп тапқанын мәлімдеді.
"Түсіністікпен қарайсыздар деп үміттенемін және болашақта азаматтық бастамалар қауіпсіз әрі қысымсыз жүзеге асырылатынына сенемін. Баршаңызға бейбітшілік тілеймін!" – деп сөзін аяқтады ол.
БҰҒАН ДЕЙІН
Сауда және интеграция министрі Арман Шаққалиев бірыңғай уақыт белдеуінің халық өміріне әсері жайлы зерттеудің нәтижесін жариялаған еді.
Үкімет отырысына онлайн режимде қосылған Арман Шаққалиев нақты деректерге негізделген нәтижелер уақыт белдеуінің өзгеруі халықтың өмірінің негізгі көрсеткіштеріне теріс әсері болмағанын айқындайды деп мәлімдеді.
