Маңғыстау облысында мұнай сервисі қызметкерлері жалақыларын толық көлемде ала алмай отырғандарын айтып, мемлекет басшысына шағымданды. Олардың айтуынша, қаңтар айынан бері еңбекақылары тек ішінара төленіп келеді. Сонымен қатар, демалыс ақылары мен толық есеп айырысуларын да ала алмай жүр, деп хабарлайды Ulysmedia.kz.
Lada.kz басылымының мәліметінше, "Mangystau Oil Refining" ЖШС қызметкерлері 2025 жылдың қаңтарынан бері жалақыларын толық көлемде алмаған. Компанияның негізгі қызметі – мұнайды сатып алу, сақтау және өңдеу арқылы қара және ашық түсті мұнай өнімдерін шығару. Алайда кейінгі уақытта кәсіпорын өнімін сату мәселесіне байланысты қиындықтарға тап болған. Осыған орай, жұмысшыларға ақысыз демалысқа шығу немесе жай ғана күте тұру ұсынылған.
Соған қарамастан, жақында компания шетелден бір топ маманды шақыртқан.
Біз жалақымызды ала алмай жүргенде, кәсіпорын 100-ден астам шетелдік маманды арнайы шақыртып, оларға барлық жағдайды жасап берді. Олардың жол шығыны, тамағы мен тұратын орны толықтай компания есебінен өтелді. Ал біз өз еңбекақымызды ала алмай, күн көрудің қамымен жүрміз, – деп наразылық білдірді "Mangystau Oil Refining" жұмысшылары.
Қысым көрсетіліп жатыр
Қызметкерлердің айтуынша, мәселені ашық көтергендерге басшылық тарапынан қысым көрсетіліп жатыр. Осыған байланысты жұмысшылар Қазақстан президентіне, облыс әкіміне, облыстық прокуратураға және Еңбек және халықты әлеуметтік қорғау министрлігіне қарасты мемлекеттік еңбек инспекциясы басқармасының басшысына бейнеүндеу жолдаған. Аймақтық еңбек инспекциясы бұл жағдайдан хабардар екенін мәлімдеп, тексеру жүргізіліп жатқанын жеткізді.
