Таиландта катер жарылған кезде зардап шеккен қазақстандық туристерге ақшасы қайтарылды, деп хабарлайды Ulysmedia.kz.
Бұл туралы катерде болған қазақстандық Бақытгүл Байкен әлеуметтік желідегі парақшасында хабарлады.
Оның сөзінше, елдегі туристік компания бұл оқиғадан кейін әр адамға 5000 бат – 75 мың теңгеден қайтарған.
- Негізгі шығын телефон, ақша, тағы басқа заттар 850 000 теңгедей. Сақтандыру болғанымен ол шығынды толық өтей алмады, дейді Бақытгүл.
“БАСТЫСЫ АМАНБЫЗ...”
Еске салайық, бұған дейін Бақытгүл құжаттары өртеніп кеткенін айтып, көмек сұраған болатын.
“Бізде қорқыныншты жағдай болды. Бүгін он екі турлық островқа баратын тур алғанбыз. Страховкалары бәрі бар дейді. Бір өкінішті жері біздің документтеріміз жанып кетіп жатыр. Менің телефоным біраз заттарымыз жанып кетті. Білетін азаматтарға көмектесулеріңізді сұраймын. Әр қазағым жалғызым дейді ғой. Өмірімде бұндай болады деп ойлаған жоқпын. Осындай болып қалды. Өте қорқынышты болды. Бірінші сәуір ешкімге сенбе, күлкі күні дейді ғой. Бізде күлетін жағдай емес. Ең бастысы аманбыз” – дейді видеодағы азамат.
ОҚИҒА ТУРАЛЫ
Бұған дейін Пхукет провинциясындағы Майтон аралы маңында туристер мінген катер жарылып кеткенін, бортта Қазақстаннан барған демалушылар да болғанын хабарлаған едік.
Өрт тұтанған кезде катерде үш адам – капитан мен екі экипаж мүшесі болған. Кейбір туристер бұл сәтте теңізде жүзіп жүрген. Bangkok post мәліметінше, катерде Қазақстан мен Ресейден келген туристер болған. Жалпы катер бортында 31 адам болған.
