Дүйсенбіде бес аптадағы ең төмен деңгейге түскен алтын бағасы бүгін қайта көтеріле бастады, деп хабарлайды Ulysmedia.kz.
БАҒА ҚАЛАЙ ҚҰБЫЛДЫ?
Споттық алтын унциясы 0,5%-ға өсіп, 4543,33 долларға жетті. Дүйсенбіде баға 2%-дан астам төмендеген еді. Ал АҚШ-та маусым айына жеткізілетін алтын фьючерстері 0,4%-ға өсіп, 4553,10 доллар болды.
Tastylive компаниясының жаһандық макроэкономика бөлімінің жетекшісі Илья Спивактың айтуынша, нарықта «әскери фактордың» қайта әсер ете бастауынан кейін алтын бағасы біршама тұрақталған.
Сонымен қатар алтынның қымбаттауына кедергі болып отырған факторлар да бар. АҚШ қазынашылық облигацияларының кірістілігі өсіп, доллар нығайып келеді. Бұл мұнай бағасының жоғары болуымен байланысты. Мұндай жағдай инфляциялық қысымды күшейтіп, табыс әкелмейтін актив ретінде алтынға сұранысты тежейді. Доллардың күшеюі де өзге валютамен есептесетін инвесторлар үшін алтынды қымбаттатады.
ҚАРА АЛТЫН ҚҰНЫ
Brent маркалы мұнай бағасы барреліне 113 доллардан жоғары деңгейде сақталып отыр. Бұған АҚШ пен Иранның Ормуз бұғазы маңындағы қақтығыстары әсер етуде. Дүйсенбіде АҚШ әскері Иранның алты шағын кемесін жойып, қанатты зымырандары мен дрондарын тоқтатқанын хабарлады.
Нарық қатысушылары биыл АҚШ-та пайыздық мөлшерлеме төмендеуі мүмкін екенін болжап отыр. Қазіргі есептеулер бойынша, 2027 жылдың наурызына қарай мөлшерлеменің көтерілу ықтималдығы 37% болса, бір апта бұрын керісінше төмендеу ықтималдығы 27% болған.
Инвесторлар осы аптада АҚШ экономикасына қатысты маңызды деректерді күтуде. Оның ішінде бос жұмыс орындары жөніндегі мәліметтер мен сәуір айына арналған жұмыспен қамту есебі бар.
Бағалы металдар нарығында да өсім байқалды: күміс 0,4%-ға қымбаттап, унциясы 73 доллар болды, платина 1,4%-ға өсіп, 1971,86 долларға жетті, ал палладий 1,1%-ға қымбаттап, 1495,43 долларды құрады.
