Ақтөбеде автогаз құю бекетінің аумағында жеңіл көлік өртеніп, салдарынан үш адам көз жұмды. Қаза болғандардың екеуі – кәмелетке толмағандар, деп хабарлайды Ulysmedia.kz.
МӘН-ЖАЙ
Оқиға 19 маусым күні кешкі уақытта Бөгенбай батыр көшесінде орналасқан автогаз құю бекетінде болған. Ақтөбе облыстық төтенше жағдайлар департаментінің мәліметінше, 112 қызметіне өрт туралы хабар сағат 22:55-те түскен.
Өрт сөндірушілер оқиға орнына жедел жетіп, жалынды сегіз минут ішінде толық ауыздықтады.
ДӘЙЕКСӨЗ
– Өртті сөндіру барысында көлік салонынан үш адамның мәйіті табылды. Олардың екеуі – кәмелетке толмағандар. Тағы бір зардап шеккен адам ауруханаға жеткізілді, – деп хабарлады Ақтөбе облыстық төтенше жағдайлар департаментінің баспасөз қызметі.
Оқиға орнына 10-нан астам техника мен 50-ден астам құтқарушы жұмылдырылды. Сондай-ақ Жедел-құтқару жасағының қызметкерлері мен Апаттар медицинасы орталығының мамандары жұмыс істеді.
Қазіргі уақытта өрттің шығу себебі анықталып, тергеу амалдары жүргізіліп жатыр.
