2016 жылы билікті күшпен басып алуға әрекет жасағаны және басқа да ауыр қылмыстар бойынша 21 жылға сотталған шымкенттік кәсіпкер Тоқтар Төлешов жазасын қысқартуға тырысып жатыр. «Сыра королі» атанған кәсіпкердің ісіндегі жаңа жайттарды оның ұлы Арсен Төлешов адвокатымен бірге түсірген видеоүндеуінде айтты, деп хабарлайды Ulysmedia.kz.
Жаңа өтініштің мәні неде?
«Шымкентпиво» зауытының бұрынғы иесінің қорғаушылары Төлешов жазасын өтеп жатқан Қарағанды облысының Абай аудандық сотына жүгініп, қылмыстық заңдағы кейінгі өзгерістерді оның ісіне қолдануды сұраған. Адвокаттың айтуынша, бұл оның әрекеттерін неғұрлым жеңіл баптар бойынша қайта саралап, жазасын қысқартуға мүмкіндік беруі мүмкін.
Адвокат Ыдырыс Әбішевтің айтуынша, 2016 жылы Төлешовке қатысты үкім Қылмыстық кодекстің 1997 жылғы редакциясындағы баптар бойынша шығарылған. Алайда содан бері Қазақстанның қылмыстық заңнамасына бірқатар өзгеріс енгізілген.
– Бұған дейін Тоқтар Төлешовтің әрекеттері баптардың неғұрлым ауыр бөліктері бойынша сараланған. Қазіргі заңнамада бірқатар саралау белгілері қылмыс құрамынан алынып тасталғанына байланысты, енді оның әрекеттері неғұрлым жеңіл баптар бойынша қайта саралануға тиіс. Сондықтан сотқа жүгіндік, – деді адвокат.
Сот өтінішті қанағаттандырса, баптардың жеңілдетілуі Төлешовтің жалпы бас бостандығынан айыру мерзімі қысқарады.
Алайда қорғаушы әзірше нақты қанша жылға қысқартуды көздеп отырғандарын айтпады. Оның сөзінше, іс материалдарын толық зерделеп, қорғау ұстанымын сотталған азаматпен келісу қажет.
Қамаудағы жағдай және биліктің қарым-қатынасы
Әңгіме барысында сотталған азаматтың ұлы Арсен Төлешов адвокаттан мұндай атышулы істі қарау кезінде қиындықтар туындамай ма деп сұрады.
Қорғаушы колония әкімшілігі немесе сот тарапынан қандай да бір қысым не біржақтылық сезінбейтінін айтты. Оның сөзінше, адвокаттың қорғауындағы адаммен кездесулеріне кедергі жоқ, ал мекеменің арнайы бөлімі барлық сұрау салуларды жедел жолдап отырады.
Тоқтар Төлешов кім?
Елдегі ең ірі сыра өндіретін зауыттардың бірінің бұрынғы иесі 2016 жылғы қаңтарда Шымкентте жүргізілген арнайы операция барысында ұсталған.
Сол жылдың қарашасында Астананың мамандандырылған ауданаралық әскери соты оны 21 жылға бас бостандығынан айырды.
ҰҚК мәліметінше, Төлешов 2016 жылғы жер митингілерін Қазақстандағы жағдайды тұрақсыздандыру, төтенше жағдай енгізу және билікті басып алу мақсатында қаржыландырған.
Ол билікті басып алуға әрекет жасаудан бөлек, трансұлттық қылмыстық қоғамдастық құрып, оған басшылық етті, азаптау, бопсалау және ұйымдасқан қылмыстық топты қаржыландыру қылмыстары бойынша да кінәлі деп танылды. Кейін оған қаржылық және салықтық қылмыстарға қатысты баптар да қосылды.
Сот шешімімен кәсіпкердің зәулім үйлері мен люкс санаттағы автокөліктері бар мүлкі мемлекет пайдасына тәркіленді.
Атақты сыра зауытының тағдыры не болды?
Төлешовтің негізгі активі – «Шымкентпиво» ЖШС кәсіпкер қамауға алынғаннан кейін «АТФ Банкі» алдындағы миллиардтаған қарыздарын өтей алмай, банкрот деп танылды.
Кейін кәсіпорынның базасында «Шымкент сыра зауыты» ЖШС құрылып, оның бірнеше қожайыны ауысты. Ақырында зауытты продюсер Баян Алагөзованың жұбайы әрі Galanz Bottlers компаниясының иесі кәсіпкер Тұрсенғали Алагөзов 8 млрд теңгеге сатып алды.
Біраз уақыттан кейін ол кәсіпорынды басқаруды 29 жастағы ұлы Арсен Алагөзовке тапсырды. Ол «Шымкент сыра зауытының» ресми басшысы атанды.
