Қасым-Жомарт Тоқаев барлық деңгейдегі мәслихатқа алдағы уақытта мерзімінен бұрын сайлау өтетінін мәлімдеді. Президент бұған дейін премьер-министр және Құрылтай төрағасымен кеңес өткізетінін, содан кейін қазіргі депутаттардың өкілетін тоқтату туралы жарлыққа қол қоятынын айтты, деп хабарлайды Ulysmedia.kz.
Партиялық жүйедегі өзгерістер
Қасым-Жомарт Тоқаевтың айтуынша, мәслихат депутаттарының басым бөлігі Amanat партиясынан сайланған. Енді партия «Әділет» партиясына қосылғаннан кейін дербес жұмысын тоқтатты. Қазір екі партияны біріктіруге қатысты заңды рәсімдер аяқталуға жақын.
Осыдан кейін, президенттің айтуынша, мәслихат депутаттарының басым бөлігінің өкілеттігіне қатысты мәселе туындайды.
– Сондықтан жақын арада премьер-министрмен және Құрылтай төрағасымен барлық деңгейдегі мәслихаттардың өкілетін мерзімінен бұрын тоқтату жөнінде кеңес өткіземін. Оның қорытындысы бойынша тиісті жарлыққа қол қоямын. Бұдан кейін Орталық сайлау комиссиясы алдағы сайлаудың күнін белгілеуі керек, – деді Тоқаев.
Жарлыққа қол қойылғанға дейін депутаттар қазіргі құрамында жұмысын жалғастырады.
Президент мәслихаттарға өтетін алдағы сайлауды мемлекеттік басқару жүйесін қайта құру үдерісінің қорытынды кезеңі деп атады.
Контекст
Еске салайық, маусымда Amanat партиясы «Әділет» партиясына қосылып, дербес қызметін тоқтатты. Бұл өзгерістер Қазақстанның саяси жүйесін қайта құру аясында жүзеге асып жатыр.
Жаңа Конституция күшіне енгеннен кейін бұрынғы екі палаталы Парламенттің орнына бір палаталы Құрылтай келді. Қазір оған Айбек Дәдебай төрағалық етеді. Сондай-ақ вице-президент лауазымы енгізілді. Бұл қызметті Ерлан Қарин атқарады.
