Қазақстандағы табысы төмен азаматтардың 90 пайызға жуығы көпбалалы отбасыларда тұрады

Ұлттық статистика бюросының есебінше, 1,034 млн қазақстандықтың табысы күнкөріс минимумына жетпейді. Бұл – ел халқының 5 пайызы.

Бір жыл бұрын бұл көрсеткіш 5,1 пайыз болған. Яғни бір жыл ішінде жағдай айтарлықтай өзгермеген.

Сандар кедейлік деңгейінің қай отбасыларда көбірек шоғырланғанын да көрсетеді.

Табысы төмен бір миллионнан астам адамның 908,8 мыңы, яғни 88 пайызы бес және одан да көп адамнан тұратын отбасыларда өмір сүреді.

Тағы 75 мың адам төрт адамнан тұратын отбасыларға тиесілі.

Статистика отбасы мүшелерінің саны көбейген сайын кедейлік шегінен төмен түсу қаупі де арта түсетінін көрсетеді.

Қай өңірлерде жағдай қиынырақ?

Өңірлер арасындағы айырмашылық айтарлықтай.

Табысы төмен тұрғындардың үлесі ең жоғары өңір – Түркістан облысы. Мұнда халықтың 8,4 пайызының табысы күнкөріс минимумынан төмен.

Абай облысында бұл көрсеткіш 7,6 пайыз, Жетісу облысында 7,2 пайыз, Маңғыстау облысында 7 пайыз.

Ал ең төмен көрсеткіш Астанада тіркелген – 2,9 пайыз.

Әсіресе ауыл тұрғындарының жағдайы күрделі.

Ақтөбе облысының ауылдық жерлерінде табысы төмен азаматтардың үлесі 11,1 пайызға жетеді. Түркістан облысында – 10 пайыз.

Ұлытау облысында бұл көрсеткіш 9,3 пайыз, Жетісу облысында 9,2 пайыз.

Контекст

Бұған дейін Energyprom сарапшылары Ұлттық статистика бюросының 2025 жылғы деректеріне сүйеніп, осыған ұқсас қорытынды жасаған.

Олардың есебінше, төрт және одан да көп баласы бар отбасылардың шамамен 46 пайызы айына бір адамға 50 мың теңгеден аз қаражат жұмсаған.

Ал отбасы мен баласы жоқ қазақстандықтардың шамамен 40 пайызының табысы 200 мың теңгеден жоғары болған.

– Тіпті бір баланың болуының өзі отбасы мүшелерінің күнделікті шығындарын едәуір қысқартуға мәжбүр етеді, – деп жазған сарапшылар.

Еске салайық, өткен аптада Еңбек министрлігі мемлекеттік жәрдемақының 39 түрінің 14-ін тағайындау тәртібін қайта қарайтыны белгілі болды.

Өзгерістер Отбасының цифрлық картасында әл-ауқаты жоғары немесе ауқатты деп белгіленген «А» және «В» санатындағы отбасыларға қатысты болады.

Шенеуніктер әлеуметтік көмекті нақты мұқтаж адамдарға бағыттап, қолдауды барынша атаулы етуді көздеп отыр.