Қазақстанның барлық өңірі, бір облыстан басқасы, 1 қазанға дейін жылыту маусымына дайындықты аяқтаған. Олжас Бектенов облысты қадағалайтын әкім орынбасарын тәртіптік жауапкершілікке тартуды тапсырды, деп хабарлайды Ulysmedia.kz.
Толығырақ
Қазақстанның солтүстік және шығыс өңірлерінде жылуды қазан айының басында беру жоспарланған. Алайда Үкімет отырысы барысында Семей қаласының жылу желілерін суық ауа райына уақытында дайындау мүмкін болмағаны анықталды.
– Жылыту маусымы жоспарға сәйкес басталды. Оңтүстік және батыс өңірлерде жылу бекітілген кестеге және ауа райы жағдайына байланысты беріледі. Мен жылу көздері мен желілердің дайындығын 1 қазанға дейін қамтамасыз етуді тапсырған болатынмын. Бір өңірден басқасының бәрі бұл тапсырманы мерзімінде орындады. Тек Семей қаласында жылу желілері уақтылы дайын болмай шықты. Абай облысы әкімінің аталған салаға жетекшілік ететін орынбасарын тәртіптік жауапкершілікке тартуды тапсырамын , – деді Премьер-министр Олжас Бектенов.
Абай облысындағы тұрғын үй-коммуналдық шаруашылық мәселелеріне Бекжан Бапышев жетекшілік етеді.
Ол Абай облысы әкімінің орынбасары қызметіне 2026 жылдың шілдесінде тағайындалған. Алайда оның Семейдегі мәселелерден бұрын хабарсыз болғанын айту қиын. 2025 жылы ол Семей қаласы әкімінің орынбасары қызметін атқарған, кейін жарты жыл бойы Абай облысының құрылыс басқармасын басқарған.
Қыс жақын
Үкімет жылыту маусымының өту барысын бақылауды жалғастырады. Олжас Бектенов өңірлердегі жылыту маусымынан өту жөніндегі штабтардың жұмысын қайта бастауды, сондай-ақ энергия көздері мен жылу желілерінің жұмысын тұрақты түрде тексеруді тапсырды.
