2026 жылғы 31 қазаннан бастап "Отбасы банк" алдын ала және аралық тұрғын үй заемдарын беру үшін алынатын комиссияны есептеу тәртібін өзгертеді. Комиссия мөлшері бұрынғыдай заем сомасының 1%-ы болады. Алайда ірі қарыздар бойынша комиссияның ең жоғары шегі 300 мың теңгеден 1 млн теңгеге дейін өседі, деп хабарлайды Ulysmedia.kz.
Банк салымшыларына негізгі тұрғын үй заемын алу талаптарын әлі толық орындамаған жағдайда алдын ала және аралық заемдар береді.
Не өзгереді?
Бұған дейін заем сомасы қанша болса да, комиссия 300 мың теңгеден аспайтын. Енді оның шекті мөлшері заем сомасына байланысты белгіленеді.
Егер заем сомасы 50 млн теңгеге дейін болса, комиссия бұрынғыдай 300 мың теңгеден аспайды. 50 млн теңгеден 100 млн теңгеге дейінгі заемдар үшін комиссияның шекті мөлшері 500 мың теңгеге дейін өседі. Ал заем сомасы 100 млн теңгеден асса, комиссия 1 млн теңгеге дейін жетеді.
Мысалы, бұған дейін 70 млн теңге қарыз алған клиент 300 мың теңге комиссия төлейтін. 31 қазаннан бастап ол 500 мың теңге төлейді. Ал 150 млн теңге заем үшін комиссия 300 мың теңгеден 1 млн теңгеге дейін өседі.
Бұл кімдерге әсер етеді?
Банктің мәліметінше, клиенттердің 92%-ы 50 млн теңгеге дейінгі сомада заем алады. Олар үшін ештеңе өзгермейді.
Жаңа талаптар 31 қазаннан бастап банк қабылдайтын өтініштерге қолданылады. Оған дейін берілген өтініштер бұрынғы шарттармен қаралады. Ал бұған дейін берілген заемдарға өзгеріс әсер етпейді.
Банк жаңа тәсілді әділ шешім деп санайды. Комиссия заем берілген кезде бір рет алынады. Мемлекеттік бағдарламалар аясында берілетін заемдар үшін комиссия алынбайды.
