Шымкентте Республика күніне орай ұйымдастырылған екі күндік мерекелік концерт аяқталды. «Астана» алаңында өткен мәдени шарада қазақстандық эстрада жұлдыздары өнер көрсетіп, мерекелік кеш отшашумен қорытындыланды, деп хабарлайды Ulysmedia.kz.
25 қазанда Шымкент қаласындағы «Астана» алаңында Республика күніне арналған мерекелік концерт жалғасты. Қала тұрғындары мен қонақтарына арналған концерттік бағдарламаға елімізге танымал эстрада әншілері мен жергілікті өнер ұжымдары қатысты.
Атап айтқанда, сахнада Жұбаныш Жексенұлы, Нұржан Керменбаев, Мәдина Сәдуақасова, Дастан Оразбеков және басқа да өнерпаздар ән шырқады.
Концерт барысында көрермендерге патриоттық әндер мен танымал музыкалық шығармалар ұсынылды.
Шымкент қаласы әкімдігінің мәліметінше, мерекелік іс-шараның негізгі мақсаты – ұлттық құндылықтарды дәріптеу, ел бірлігін нығайту және Республика күнінің тарихи маңызын насихаттау.
Айта кетейік, 1990 жылғы 25 қазанда Қазақ КСР-інің Мемлекеттік егемендігі туралы декларация қабылданды. Бұл құжат Қазақстанның тәуелсіз мемлекет ретінде қалыптасуына негіз болған маңызды тарихи қадамдардың бірі саналады.
Биылғы Республика күні Қазақстан Тәуелсіздігінің 35 жылдығы қарсаңында аталып өтті.
Шымкентте ұлттық мерекеге орай түрлі мәдени және қоғамдық іс-шаралар ұйымдастырылды.
Мерекелік кеш отшашумен аяқталды
Екі күнге созылған мерекелік концерттің қорытындысында «Астана» алаңында отшашу ұйымдастырылды.
Осылайша Шымкентте Республика күніне арналған мерекелік шаралар аяқталды.
