Абай облысының полицейлері үш жылдан аса уақыт бойы хабар-ошарсыз кеткен ер адамның өліміне қатысты қылмысты ашты. Осы уақыт бойы оны әйелінің арызы бойынша іздеген. Ақыры күдікті қылмысын мойындап, марқұмның денесін жасырған жерді көрсетті, деп хабарлайды Ulysmedia.kz.
Оқиға 2023 жылғы қыркүйекте басталған. Сол кезде әйел жұмыс іздеп кеткен күйеуінен хабар болмай, полицияға жүгінген. Ер адам қоңыраулар мен хабарламаларға жауап бермей қойған.
Құқық қорғау органдары іздеу жұмыстарын ұйымдастырғанымен, сол кезде оның қайда жоғалғанын анықтай алмады.
Нәтиже болмағанына қарамастан, тергеу тоқтатылған жоқ. Полицейлер ер адамның жоғалуына қатысты түрлі болжамды тексеріп, оның тағдыры туралы білуі мүмкін адамдарды іздестірген.
Уақыт өте келе тергеушілер адам өлтіру қылмысына қатысы болуы мүмкін азаматты анықтады. Ол болжамды қылмыстан кейін басқа іс бойынша сотталып, жазасын түрмеде өтеп жатқан.
Полицейлер қосымша тексеру жүргізіп, оның ер адамның жоғалуына қатысы болуы мүмкін екенін растайтын материалдар жинаған.
Нәтижесінде күдікті қылмысын мойындап, оқиғаның қалай болғанын айтып берген. Сондай-ақ, марқұмның денесін жасырған жерді көрсеткен.
Қылмыстың мән-жайы анықталғаннан кейін тергеу аяқталды.
ІІМ мәліметінше, айыптау қорытындысы жасалған қылмыстық іс сотқа жолданған.
