Абай ауданында өрт: туристерге демалыс аймағынан кетуге кеңес берілді

Өрттің жанында қазір демалушылар тұрып жатқан «Шошқала» демалыс аймағы бар. Төтенше жағдайлар департаменті мен ТЖД қызметкерлері түсіндіру жұмыстарын жүргізуде.

Облыста ауа температурасы 28°С, солтүстік-батыстан 16 м/с жел соғады.

Еске салайық, өрт бүгін тұтанған болатын.

Өрт орнына Төтенше жағдайлар министрлігі бөлімшелерінің күштері мен құралдары жіберілді: жеке құрамның 100 адамы мен облыстың Төтенше жағдайлар департаментінің 20-дан астам техникасы, ТЖМ 68303 әскери бөлімі бар

Оқиға орнына Төтенше жағдайлар министрлігінің авиациясы жұмылдырылды.

Алдын ала өрт аумағы 20 гектарды құрайды.

Төтенше жағдайлар министрі Сырым Шәріпханов Абай ауданындағы өрт болған жерге ұшып келді.

8 маусымда Төтенше жағдайлар министрлігі Абай ауданында шамамен 30 мың гектар аумақты алып жатқан өрт туралы хабарлады. Алайда 9 маусым күні кешке қарай оның аумағы 60 мың гектарға дейін ұлғайып үлгерді. Сондай-ақ орман шаруашылығының 14 қызметкерімен байланыс үзілгені айтылды. Осыған байланысты Семей қаласында төтенше жағдай жарияланды.

9 маусым күні түн ортасына таман президенттің баспасөз қызметі Қасым-Жомарт Тоқаевтың Вьетнамға сапарын кейінге қалдырып, Абай ауданындағы өрт аймағына ұшпақ болғанын хабарлады. Сондай-ақ Президент Абайдағы өртпен күресу үшін бар мүмкіндікті пайдалануды тапсырды.

10 маусымда Тоқаев Төтенше жағдайлар министрлігінің басшысы Юрий Ильинді қызметінен босатты. Сол күні түнде Төтенше жағдайлар министрлігі Абайдағы өртті сөндіруге Алматыдан және тағы төрт облыстан қосымша күштер мен құралдар жіберілетінін хабарлады.

Кейін Абай ауданында жоғалған орманшылардың барлығы (14 адам) қаза тапқаны белгілі болды.Адам өлімі фактісі бойынша қылмыстық іс қозғалды. Тоқаев 12 маусымды жалпыұлттық аза тұту күні деп жариялады.

Бас прокурордың орынбасары Жандос Өміралиев Абайдағы өртке қатысты Ильин, Экология министрі Зүлфия Сүлейменова, облыс әкімі Нұрлан Ұранхаев және Шығыс Қазақстан облысының әкімі Даниал Ахметовтен жауап алынатынын айтты.