Үкімет республиканың бірқатар жылу-электр орталығының (ЖЭО) қызметін тексеру қорытындысын жариялады, деп хабарлайды Ulysmedia.kz.
Прокуратура органдары 11 жекеменшік ЖЭО-да жылу-энергетика және табиғи монополиялар саласындағы заңнаманың сақталуына тексеру жүргізді.Тексеру барысында кейбір нысанда жүйелі кемшіліктер мен заң бұзушылықтар анықталды.
Әр станцияда қондырғылардың әбден тозығы шыққан, бұл жылу беру маусымында апаттарға әкелуі мүмкін.
“Талқылау қорытындысы бойынша уәкілетті органдарға станцияларда күрделі жөндеу мен модернизациялауды қамтамасыз ету бойынша меншік иелерімен жұмыс жүргізу тапсырылды. Үкімет басшысы 2023-2024 жылдарға арналған нақты жұмыс кестесін белгілеп, оның орындалуын бақылауды талап етті. Міндеттемелер бұзылған жағдайда станцияларды мемлекет меншігіне қайтару шаралары қабылданатын болады. Сондай-ақ комиссия отырысында еліміздің ірі өнеркәсіп кәсіпорындарын газбен қамтамасыз ету саласындағы тиімсіз монополист делдалдарды жою мәселесі де талқыланды.Тиісті инфрақұрылымы бар бұл компаниялардағы мемлекеттік үлестер кезінде арзандатылған бағамен жеке қолға өткен. Нәтижесінде бұл газ тасымалдау нарығының монополиялануына және қызмет көрсету тарифтерінің көтерілуіне алып келді”, – делінген үкімет хабарламасында.
Айта кетейік, халыққа жолдауында президент Тоқаев елдің энергетикалық қауіпсіздік мәселесіне айрықша тоқталды. Ол өткен қыста еліміздің жылу электр станцияларында қайта-қайта апат болуы жылдар бойы шешілмеген мәселенің бетін ашып бергенін мәлімдеді.
